पेरिस सेन्ट–जर्मेन फ्रेन्च लिग कपको सेमिफाइनलमा प्रवेश

१० खेलाडीमा सीमित एमिएन्सलाई २–० ले हरायो

2018-01-11 14:06

काठमाडौं, २७ पुस । पेरिस सेन्ट–जर्मेन (पिएसजी) फ्रेन्च लिग कप फुटबलको सेमिफाइनलमा प्रवेश गरेको छ ।

कप अन्तर्गत गएराति भएको क्वाटरफाइनलमा १० खेलाडीमा सीमित एमिएन्सलाई २–० ले हराउँदै पिएसजीले अन्तिम चारमा स्थान पक्का गरेको हो । पिएसजीको जितमा नेइमार र एड्रिएन राबिओट्ले गोल गरे । एमिएन्सका गोलरक्षक रेगिस गुर्ट्नगरले ३४ औं मिनेटमा पिएसजीका एलियन एमबाप्पेलाई फउल गरेपछि रातो कार्ड खादै मैदानबाट बाहिरिए । त्यसपछि एमिएन्स १० खेलाडीमा सीमित भयो । यस्तै थोमस मोन्कोन्डुइट्ले नेइमारलाई फउल गरेपछि ५३ औं मिनेटमा पिएसजीले पेनाल्टी पायो । त्यसमा नेइमारले गोल गर्दै पिएसजीलाई अग्रता दिलाए । यस्तै पिएसजीका लागि दोस्रो गोल ७८ औं मिनेटमा राबिओट्ले हेड मार्फत गरे । यहि सिजन विश्व कीर्तिमानी मूल्यमा बार्सिलोनाबाट पिएसजी आएका नेइमारले पिएसजीबाट सबै प्रतियोगितामा गरेर २२ खेलमा २० गोल गरिसकेका छन् । फ्रेन्च लिग कपमा उनको यो खेल डेब्यु थियो ।

नेइमारले पिएसजीबाट लिग वान, च्याम्पियन्स लिग, फ्रेन्च कप र फ्रेन्च लिग कप सबैको डेब्यु खेलमा गोल गरेका छन् । पिएसजीले लगातार चारपटक फ्रेन्च लिग कपको उपाधि जितिसकेको छ । यो खेलमा एडिसन काभानी भने मैदान बाहिर थिए । पिएसजीले अब सेमिफाइनलमा रेनसँग प्रतिस्पर्धा गर्नेछ ।

    Comment Here!


सम्बन्धित समाचार

View All