ज्ञापनपत्रमा नेपाली कांग्रेस नुवाकोटको मुख्य तिन माग यस्तो

2018-01-11 15:10

काठमाडौँ, २७ पुस । नेपाली काँग्रेस नुवाकोट जिल्लाशाखाले निर्वाचनमा घाइते भएकालाई सरकारले उपचार गर्नुपर्ने मागसहित प्रधानमन्त्री शेरबहादुर देउवासमक्ष ज्ञापनपत्र बुझाएको छ ।

जिल्ला सभापति जगदीश्वरनरसिंह केसीको नेतृत्वमा आज बालुवाटार पुगेको टोलीले पूर्वअर्थमन्त्री डा रामशरण महतलाई लक्षित गरी ककनी गाउँपालिकामा भएको बम विस्फोटमा घाइते विद्यार्थी उपेन्द्र मिश्रसहित चुनाबका क्रममा घाइते भएका देशभरका व्यक्तिको उपचार राज्यले गर्नुपर्ने माग राखेका छन् ।

ज्ञापनपत्रमा भूकम्पपीडितलाई दिएको रकम कम भएकाले तिनको घर निर्माणमा समस्या भएको भन्दै रु दुई लाख थप गर्न आग्रहसमेत गरिएको छ ।

यसैगरी पृथ्वीनारायण शाहले बाइसे–चौबिसे राज्य विजयका क्रममा नुवाकोटलाई राजधानी बनाउन उपयुक्त स्थान देखेका थिए त्यसैले अहिले पनि प्रदेश नं ३ को अस्थायी राजधानी नुवाकोट बनाउन पनि उक्त टोलीले माग गरेको छ ।

भेटमा प्रधानमन्त्री देउवाले उक्त टोलीले उठाएका मागमा आफू गम्भीर भएको र यस विषयमा छलफल गरेर आवश्यक निर्णय लिने प्रतिबद्धता व्यक्त गर्नुभएको भेटमा सहभागी नेविसंघका नेता निरञ्जन थापाले जानकारी दिनुभयो ।

 

    Comment Here!


सम्बन्धित समाचार

View All