टोटनह्यामको इपिएल जीतमा केनको किर्तिमानी

एभर्टन टोटनह्यामबाट ४-० ले पराजित

2018-01-14 14:49

काठमाडौं, ३० पुस । इंग्लिस प्रिमियर लिग फुटबल अन्तर्गत गएराति भएको खेलमा टोटनह्याम विजयी भएको छ ।

घरेलु मैदानमा भएको खेलमा टोटनह्यामले एभर्टनलाई ४–० ले हराएको हो । पहिलो हाफमा एक गोल गरेको टोटनह्यामले दोस्रो हाफमा थप तीन गोल गरेर प्रभावशाली जित दर्ता गरेको हो । माउरिसिओ पोकेटिनोको टिम टोटनह्यामको जितमा ह्यारी केनले दुई तथा सन हेङ–मिन र क्रिष्टियन एरिक्सनले एक एक गोल गरे । २६ औं मिनेटमा सनले गोल गर्दै टोटनह्यामलाई पहिलो हाफमा १–० को अग्रता दिलाए । ४७ औं मिनेटमा केनले व्यक्तिगत पहिलो गोल गर्दै टोटनह्यामको अग्रता दोब्बर पारे । त्यसको १२ मिनेटपछि केनले व्यक्तिगत दोस्रो गोल गरेपछि टोटनह्यामले ३–० को अग्रता लियो । ८१ औं मिनेटमा एरिक्सनले गोल गरेपछि घरेलु टोली ४–० ले विजयी भयो । जितपछि पा“चौं स्थानको टोटनह्यामको २३ खेलबाट ४४ अंक भएको छ । २७ अंकसहित एभर्टन नवौं स्थानमा छ । एभर्टनसंगको खेलमा दुई गोल गरेका केन प्रिमियर लिगमा टोटनह्यामबाट सबैभन्दा धेरै गोल गर्ने खेलाडी बनेका छन् । यो सिजन प्रिमियर लिगमा २० गोल गरिसकेका केनले सबै प्रतियोगितामा गरेर टोटनह्यामबाट यो सिजन २८ खेलमा २८ गोल नै गरेका छन् । केनले एभर्टनसंगको खेलको ४७ औं मिनेटमा गरेको गोल प्रिमियर लिगमा टोटनह्यामबाट गरेको ९७ औं गोल थियो । त्यसको १२ मिनेटपछि उनले लिगमा ९८ औं गोल गरे । ५९ औं मिनेटमा गरेको गोलसंगै उनी प्रिमियर लिगमा सर्वाधिक गोल गर्ने टोटनह्याम खेलाडीको रुपमा नाम लेखाउन सफल भए ।

    Comment Here!


सम्बन्धित समाचार

View All