आन्दोलनमा वीर अस्पतालका नर्सहरु, मर्कामा विरामी

2018-01-14 17:01

काठमाडौं, ३० पुस । वीर अस्पतालका नर्सहरु ११ बुंदे मागसहित हातमा कालोपट्टी बाधेर आन्दोलनमा उत्रिएका छन् । बिहान १० बजे अस्पताल परिसरमा नर्सहरु १ घण्टाका लागि काम छाडेर आन्दोलनमा उत्रिएका हुन् । सरकारले आफुहरुको मागलाई वेवास्ता गरेकोले सेवा बन्द गरेर आन्दोलनमा उत्रन बाध्य भएको नर्सहरुको भनाई छ ।

नेपाल नर्सिङ संघकोको अगुवाइमा नर्सहरुले बुधबारदेखि नै हातमा कालोपट्टी बाँधेर मौन विरोध सुरु गरेका थिए । तर सरकारले मागलाई वेवास्ता गरेपछि शुक्रबार देखि १ घण्टाका लागि सेवा बन्द गरीएको छ ।

उनीहरुले मानव अंग प्रत्यारोपण केन्द्रबाट निष्काशन गरिएका नर्सिङ कर्मचारीलाई बिनासर्त अविलम्ब पूनर्बहाली गर्नुपर्ने लगाएतका ११ बुदे माग राखेका छन् ।

यस्ता छन् आन्दोलनरत नर्सहरुको लिखित माग ११ बुँदे मागहरु:

 

  •  मानव अंग प्रत्यारोपण केन्द्रबाट निष्कासन गरिएका नर्सिङ कर्मचारीहरुलाई बिनासर्त अविलम्ब पुनर्बहाली गरियोस् ।
  •  अधिकारसहितको नर्सिङ सेवा महाशाखा पुनस्र्थापना गरियोस् ।
  • जनतालाई गुणस्तरीय नर्सिङ सेवा दिनका लागि नेपाल सरकारले बनाएको ’नर्स बिरामीको अनुपात’ सबै अस्पतालमा यथाशीघ्र लागू गरियोस् ।
  • नेपाल सरकारका नर्सहरुलाई उपलब्ध गराइरहेको न्यूनतम तलबभत्ता सरह विभिन्न निजी स्वास्थ्य संस्थामा कार्यरत नर्सलाई पनि तहगत हिसाबबाट उपलब्ध गराइयोस् ।
  • भोलेन्टियरका नाममा भएको नर्सको श्रमशोषण बन्द गरियोस्।
  • सार्वजनिक, निजी र साझेदारी क्षेत्रको सहकार्यलाई प्रवर्धन गरी स्कुल तथा उद्योगहरुमा गुणस्तरीय नर्सिङ सेवा पुर्यामउने व्यवस्था गरियोस् ।
  • सरकारी तथा निजी क्षेत्रमा कार्यरत नर्सहरुलाई लुगा भत्ता, रात्रिकालीन भत्ता, बिदा सुविधा र जोखिम भत्ता गरी सोही अनुरुप निजी स्वास्थ्य संस्थामा पनि सोही अनुपातमा लागू गरियोस् ।
  • दुर्गममा काम गर्ने नर्सहरुलाई उचित पारिश्रमिक र सुरक्षाको प्रत्याभूति गरियोस् ।
  • योग्यता पुगेका नर्सिङ कर्मचारीलाई वृत्ति विकासका लागि प्रस्ट खाका तयार गरियोस् ।
  • योग्यता पुगेका अनमीलाई स्टाफ नर्स, स्टाफ नर्सलाई ब्याचलर नर्सिङ, ब्याचलर नर्सिङलाई मास्टर नर्सिङ र मास्टर नर्सिङलाई पिएचडीसम्म तलबी अध्ययन बिदाको व्यवस्था गरियोस् ।
  • श्रम ऐन, २०७४ सबै स्वास्थ्य क्षेत्रमा यथाशिघ्र लागू गरियोस् ।

नर्सहरुले आफ्ना मागहरु पूरा नभए माघ १, २ र ३ गते ३ घन्टा काम नगर्ने, ४, ५ र ६ गते सबै अस्पताल र शैक्षिक संस्थामा ८ देखि ४ बजेको सिफ्टमै ड्युटी नजाने र माघ ७ गते २४ घन्टा नै ड्युटी छाडेर स्वास्थ्य मन्त्रालयमा धर्ना दिर्ने चेतावनी दिएका छन् ।

वीर अस्पताल जस्तै देशभरका अस्पतालमा कार्यरत नर्सिङ कर्मचारीहरुले शुक्रबार देखी एक घण्टा काम छाडेर आन्दोलमा उत्रिएका छन् ।

 

    Comment Here!


सम्बन्धित समाचार

View All