स्वराजको २४घण्टे भ्रमण, देउवा सरकार बेखबर ?

2018-01-31 09:02

काठमाडौं १७ माघ । नयां संविधान निर्माणको बेलादेखि विग्रेको नेपाल भारत सम्वनध र भारत र एमाले सम्वन्ध सुधार गर्ने उद्धेश्यका साथ भारतीय विदेशमन्त्री सुस्मा स्वराजले २४ घण्टे काठमाडौं भ्रमणमा आउंदै छिन् ।
छिमेकी भारतका तर्फबाट बरिष्ठ कुटनीतिज्ञको नेपाल भ्रमण हुन लागिरहंदा देउवा सरकार भने बेखवर जस्तै रहेको छ । भारतीय विदेश मन्त्रालयले स्वराज भ्रमणको औपचारिक जानकारी दिएको दुई दिन भइसक्दा पनि नेपालका तर्फबाट कुनै औपचारिक जानकारी सार्वजनिक गरिएको छैन ।
भारतीय विदेश मन्त्रालयले स्वराजको भ्रमण दुई देशबीच उच्च राजनीतिक भेटघाटको निरन्तरता भएको बताएको छ ।
स्वराज बिहीबार काठमाडौं आइपुग्नेबारे सोमबार अबेर जानकारी पाए पनि उनी कति बजे काठमाडौं उत्रने, त्यसपछिको कार्यतालिका के–के छ भन्नेबारे मंगलबार साँझसम्मपरराष्ट्र मन्त्रालयको शिष्टाचार महाशाखाले केही बताउन सकेको छैन ।
विशेष विमानमा काठमाडौं आउने स्वराजको टोलीमा भारतीय नवनियुक्त विदेशसचिव विजयकेशव गोखले, प्रवक्ता रभिस कुमार, नेपाल हेर्ने डेस्क प्रमुख सुधाकर दलेलालगायत वरिष्ठ अधिकारीहरू हुनेछन् ।
स्वराज काठमाडौं झर्ने वित्तिकै राजनीतिक दलका नेताहरूलाई भेट्ने तयारी छ । त्यसका लागि भावी प्रधानमन्त्रीका रुपमा हेरिएका केपी शर्मा ओली र माओवादी अध्यक्ष प्रचण्डलाई कतिबेला कहां भेट्ने भन्ने सूचित गरिसकिएको दूतावास स्रोतले बताएको छ ।
शुक्रकार फर्कनुअघि राष्ट्रपति विद्यादेवी भण्डारी र प्रधानमन्त्री शेरबहादुर देउवालाई भेट्ने बताइएको छ । सबै भेटवार्ता दुईपक्षीय सहकार्य र सम्बन्ध विस्तारमा केन्द्रित हुने यस अघि नै भारतीय विदेश मन्त्रालयको वक्तव्यमा उल्लेख छ ।
परराष्ट्र सहप्रवक्ता रामबाबु ढकालले विदेशमन्त्री आउने जानकारी भएको र दुईपक्षीय वार्तालगायतको तयारी भइरहेको जनाए ।
यो भ्रमण नेपाल सरकारको निमन्त्रणामा हुन लागेको होइन । परराष्ट्र मन्त्रालयका एक अधिकारीले भने, ‘दलको निमन्त्रणा वा भारत सरकारको सन्देश बोकेर आउन लागेको विशेषदूत हैसियतको भ्रमण हो यो ।’
विदेशमन्त्री स्वराजको भ्रमणको मुख्य चासो र सबै चांजोपांजो एमाले अध्यक्ष केपी ओलीसँगको सल्लाहमा भएको बताइएको छ । अध्यक्ष ओलीसँग दुईपटक फोन वार्ता गरेका मोदीले पछिल्लो परिस्थितिबारे छलफल गर्न स्वराजलाई नेपाल पठाउने जानकारी दिएका थिए । भारतले निर्वाचनपछिको अवस्थालाई नजिकबाट नियाल्न यो भ्रमण हुन लागेको हो ।
एमाले अध्यक्ष ओलीले यो भ्रमणलाई गहिरो अभरिुचिपूर्वक हेरेका छन् । नेपालमा यस्तो परिवेशमा यस्तो खालको भारतीय पक्षको उच्चस्तरीय भ्रमण यो पहिलो हो । भारतले नेपालमा जे भएपनि आफुले गराएको भन्ने सन्देश दिन खोज्ने निरन्तरतामा नै यो भ्रमण भएको एकजना बरिष्ठ कुटनीतिज्ञले बताए ।

    Comment Here!


सम्बन्धित समाचार

View All