प्रदेश नम्बर ७ को मुख्यमन्त्रीमा भट्टको दाबी पेस

2018-02-14 18:32

 

कैलाली, २ फागुन। प्रदेश नम्बर–७ को मुख्यमन्त्रीका लागि माओवादी केन्द्रका संसदीय दलका नेता त्रिलोचन भट्टले प्रदेशप्रमुख समक्ष दाबी पेस गरेका छन् ।

नेकपा एमाले र माओवादी केन्द्रका ३७ जना सांसदको समर्थन रहेको संयुक्त हस्ताक्षरको पत्रसहित भट्टले मुख्यमन्त्रीका लागि प्रदेशप्रमुख मोहनराज मल्लसमक्ष बुधबार दिउँसो दाबी पेस गरेका हुन् ।

प्रदेशसभाका बहुमत सांसदहरुको समर्थन आफूलाई रहेकाले नेपालको संविधानको धारा १६८ को उपधारा २ बमोजिम मुख्यमन्त्री नियुक्तिका लागि दाबी पेस गरिएको प्रदेशप्रमुखलाई बुझाइएको पत्रमा उल्लेख गरिएको छ ।

प्रदेश–७ मा माओवादी केन्द्रको नेतृत्वमा सरकार बनाउने सहमति एमाले–माओवादीबीच यसअघि भएको थियो । माओवादीले मुख्यमन्त्रीको उम्मेदवार भट्टलाई बनाउने निर्णय गर्दै उनलाई संसदीय दलको नेता यसअघि नै चयन गरेको थियो ।

धनगढीबाहिर रहेका कारण एमाले सांसद हर्कबहादुर कुँवर र निर्मला बडालले मुख्यमन्त्रीमा समर्थन रहेको पत्रमा हस्ताक्षर गरेका छैनन् ।

    Comment Here!


सम्बन्धित समाचार

View All