दाङ,१२ मंसिर । दाङको एक विद्यालयमा कोठा अभावको कारण देखाउंदै दिवा खाजा कार्यक्रम शौचालय भवनमा पकाउने गरिएको छ । विद्यार्थी बढेको तर कोठा नभएको भन्दै शान्तिनगर अमुवामा रहेको अम्बिकेश्वरी आभारभूत विद्यालयले शौचालयलाई भान्सा कोठा बनाएको हो ।

दाङको शान्तिनगर २ अमुवामा रहेका अम्बिकेश्वरी आधारभुत विद्यालयमा शिशु कक्षादेखी कक्षा ८ सम्म पढाई हुन्छ । विद्यालयमा विद्यार्थी नियमित रुपमा पढ्न आउन भनेर विद्यालयले दिवा खाजा कार्यक्रम संचालन गरिरहेको छ । खाजा कार्यक्रम संचालनका लागि स्थानीय गाउँपालिकाले सहयोग पनि गरेको छ । तर, विद्यालयमा भने खाजा बनाउनका लागि भान्सा कोठाको अभाव छ । पकाउने ठाउंको अभाव भएपछि विद्यालयले शौचालयलाई भान्छा कोठाको विकल्प बनाइएको छ । शौचालयलाई बन्द गरी त्यसलाई भान्सा कोठा बनाउन विद्यालय बाध्य भएको छ ।

यता गाउँपालिकाले भने अम्बिकेश्वरीमा मात्र नभई गाउँपालिका भित्रका अन्य विद्यालयहरुमा पनि शिक्षक अभाव भएको जनाएको छ । त्यसैगरी गाउँपालिका भित्र धेरै विद्यालयलाई भवन अभाव भएको गाउँपालिका शिक्षा युवा तथा खेलकुद शाखाका प्रमुख घनश्याम वलीले जानकारी दिए । गत बर्ष अम्बिकेश्वरी विद्यालयलाई २ कोठाको भवन दिएको भन्दै दिवा खाजा कार्यक्रमलाई शौचालयमा पकाएर खुवाउनु गलत भएको उनले जिकिर गरे । दिवा खाजाको भान्सा शौचालयबाट अनेत्र व्यवस्थापन गर्न आग्रह गर्ने वलीले बताए । करिब २५० जना विद्यार्थी रहेको उक्त विद्यालयमा कक्षा कोठा अभावको कारण एउटा कोठालाई दुई भाग गरी कक्षा संचालन गर्दै आएको विद्यालयका प्रधानाध्यापक अब्दुल गफार मियाँले बताउंछन् । यस बर्षको शैक्षिक सत्रदेखी विद्यालयमा कक्षा ५ सम्म अग्रेजी माध्यमवाट पढाई शुरु गरेपछि गतबर्षको तुलनामा विद्यार्थी संख्या बढेको छ । जसका कारण पनि कक्षा कोठाको अभाव भएको प्रधानध्यापक मियाँले जिकिर गरे ।

२०६८ सालदेखी विद्यालयका पढाउँदै आएका शिक्षक रेशम खड्काले विद्यालयमा धेरै समस्या भएको बताउंछन् । शुरुमा आउँदा भवन लगाएत अन्य धेरै समस्या रहेकोमा अहिले केही क्रमिक रुपमा सुधार भए पनि अझै धेरै समस्या हल गर्न बांकी रहेको खड्का बताउंछन् ।
विद्यालयलाई कक्षा संचालन गर्न ११ वटा कक्षा कोठा आवश्यक पर्छ । पटक–पटक गाउँपालिकामा विद्यालयको समस्याको बारेमा जानकारी गराएको भएता सुनुवाई भएको छैन । विद्यालयलाई ४ वटा कोठाको आवश्यक छ । गत बर्ष २ वटा गाउँपालिकाले दिएको थियो तर त्यो अपुग भएको प्रधानध्यापक मियां बताउंछन् । कक्षा ८ सम्म पढाई हुदै आएको विद्यालयमा निमावि तहको कुनै पनि दरबन्दी नहुदाँ प्रा.विको तहका ४ जना दरबन्दी शिक्षक र ४ जना निजी श्रोतका शिक्षकहरुले पढाउँदै आएकन छन् । विद्यालयले शिशु कक्षा, एल.केजी, युकेजी कक्षा १ गरी कक्षा संचालन गर्दै आएको छ ।