काठमाडौं, २७ मंसिर । कर्णाली प्रदेशका आन्तरिक मामिला तथा कानूनमन्त्री नरेश भण्डारीले दुर्घटनापछि मात्र उपचार खोज्ने प्रवृत्ति अन्त्य गर्नुपर्ने बताउनुभएको छ । विश्व खाद्य कार्यक्रमद्वारा आज सुर्खेतमा आयोजित कार्यक्रममा उहाँले समस्या सिर्जना भएपछि मात्र तयारी गर्ने बानीमा परिवर्तन ल्याउनुपर्ने बताउनुभयो ।

विपद् जोखिम घटाउन कर्णाली सरकारले विभिन्न लोककल्याणकारी योजना ल्याएको जानकारी दिँदै मन्त्री भण्डारीले नागरिक पनि सचेत नबने सरकारी प्रयासले सार्थकता नपाउने धारणा राख्नुभयो । “कर्णालीमा भूकम्पीय जोखिम बढी छ, बाढीपहिरोले वर्षेनि क्षति पु¥याइरहेको छ”, उहाँले भन्नुभयो, “समुदाय आफँै सचेत हुन सके विपद्बाट मानवीय क्षति कम हुनसक्छ, दुर्घटना निम्तिसकेपछि चेत खुल्ने प्रवृत्तिबाट भने हामी सबै मुक्त हुनुपर्छ ।” मन्त्री भण्डारीले प्रदेश सरकारले १७ लाख नागरिकको दुर्घटना बीमा गरेको जानकारी दिनुभयो । विपद्मा परी ज्यान गुमाउने नागरिकलाई रु दुई लाख आर्थिक सहायता प्रदान गर्ने व्यवस्था गरिएको उहाँको भनाइ छ ।

प्रदेश योजना आयोगका सदस्य डा दीपेन्द्र रोकायाले विपद् व्यवस्थापनका लागि एकीकृत बस्ती विकासमा जोड दिनुपर्ने बताउनुभयो । त्यस्तै, विश्व खाद्य कार्यक्रमले प्रदेश राजधानी वीरेन्द्रनगरको शिवालय चोकमा मानवीय सहायतास्थल निर्माण गर्ने जनाएको छ । कार्यक्रमले १८ सय वर्गमिटरमा चार भवन निर्माण गरी राहत तथा उद्धार सामग्री, खाद्यान्न सामग्री भण्डारण गरिने बताइएको छ ।