बुटवल, २६ चैत्र । कोरोना [विशेष] अस्थायी अस्पताल बुटवलको आइसोलेसमा उपचारका क्रममा ज्यान गुमाएका बाबुराम थापाको ११ दिनपछि शव बुझ्ने सहमति भएपनि थापाको मृत्यु के कारणले भएको भन्ने बिषय अनुत्तरीत बनेको छ ।
३४ वर्षिय थापाको मृत्यु प्रकरण बल्झिदै गएपछि ११ औं दिनमा परिवार, प्रदेश सरकार र [सरोकारवाला] पक्षबिच सहमति भएर शव बुझ्ने निर्णय भएपनि थापाकी श्रीमतीले के कारणले श्रीमानको मृत्युको भएको हो ? भन्ने प्रश्न भने अनुत्तरीत बनेको छ । मृत्यु पछि कोरोना भाईरसको रिपोर्ट नेगेटिभ भेटिएपछि मृतक थापाकी श्रीमती रिता थापाले श्रीमानको मृत्युको कारण माग गर्दै शव बुझ्न अस्विकार गर्दै आएकी थिईन् ।

मृतक थापाका् शव आजै धार्मिक परम्परा अनुसार दाहसंस्कार गरिएको छ । अस्पतालबाट पिपिई लगाएका अस्पतालका कर्मचारीहरुले शबदाह गृहसम्म शव पुर्याई अन्त्येष्ठी गरिएको थियो । मृतक थापाको शव पिपिई लगाएका स्वास्थ्य कर्मचारीले छुट्टै ट्याक्टरमा राखेर स्मशानघाट सम्म पुर्याइएको थियो । परिवार एम्बुलेन्समा र मलामी अर्कै सवारी साधनमा घाटसम्म पुगेका थिए । त्रासपुर्ण वाताबरणमा दाहसंस्कार गरिएबाट बाबुराम थापा कोरोनाको कारणले मृत्यु भएको हो कि भन्ने आशंका बढाएको छ ।
प्रदेश ५ को सामाजिक बिकास मन्त्रालयमा आज भएको सर्बपक्षिय छलफलले सहमति जुटाएको हो ।
आज भएको सहमतिमा परिवारलाइ दिनेगरि आधारभूत राहत कोष बनाउने जसमा शुरुमा ५ लाख ५ हजार रकम रहने भनिएको छ । त्यसमा आर्थिक सहयोग थप जुटाइने उल्लेख गरिएको छ । कोषमा दाताहरुको सहयोगबाट आजमात्रै साढे ८ लाख रकम संकलन भैसकेको उद्यमी जगत पोखरेलले बताउनुभयो ।
सहयोग जुटाउन तथा ब्यवस्थापन गर्न पूर्व सांसद बिनोद पहाडी, उद्यमी जगत पोखरेल, अधिकारकर्मी पदम कार्की, होटल ब्यबसायी समुद्र जिसिको पहल र जिम्मेबारीमा रहनेगरि कोष बनाइएको सहमतीमा लेखिएको छ ।
सहमतीमा २ वटा छोराहरुलाई उच्च शिक्षासम्म पठनपाठन र मृतककी श्रीमती रिता थापा क्षेत्रीलाइ सैनामैनामै स्थानीय सरकारले योग्यता अनुसारको रोजगार दिने समेत निर्णय भएको पुर्व सभासद विनोद पहाडीले बताउनुभयो ।
सहमती पछि लुम्बिनी प्रादेशिक अस्पतालको शवग्रहमा रहेको शव परिवारले बुझेर अन्तिम संस्कार गर्ने भएकाछन् ।
पाल्पा रिब्दिकोट ५ कुसुमखोला स्थायी घर भई थापा परिवार सैनामैना नगरपालिका ४ सिसौंडाडामा डेरामा बस्दै आएको छ । दुबईबाट चैत्र पहिलो साता नेपाल फर्किएका थापा उपचारका लागि चैत १३ गते लुम्बिनी प्रादेशिक अस्पताल आएका थिए ।
अस्पतालमा भर्ना भएको चौथो दिन चैत्र १६ गते धागो कारखानामा बनाइएको कोरोना विशेष अस्थायी अस्पतालमा उनको ज्यान गएको थियो । उनको मृत्यु भएको दिन मात्रै स्वाब परीक्षणका लागि पठाइएको थियो भने दोस्रो दिन मात्रै रिपोर्ट नेगेटिभ आएको थियो । मृत्यु भएको केहि दिन कोरोना भाइरसकै कारण मृत्यु भएको आशंकामा शव उठाउन आफन्त नजुटेपछि पछि स्थानीय अधिकारकर्मी तथा स्थानीय राजनितीकदलहरुले पिडीत परिवारलाई न्याय दिलाउन आवाज उठाएका थिए ।