रौतहट, २३ भदौ ।  रौतहटको बजारमा हरियो तरकारीको भाउ एक्कासी बढेको छ । हरियो तरकारी रौतहटको बजारमा सर्लाही र मकवानपुरबाट आउने गरेको छ ।

पछिल्लो समयमा बन्दाबन्दी र निषेधाज्ञाका कारण सर्वसाधारणको आम्दानी सुक्दै गएको र तरकारीको भाउ बढदै गएका कारण आम सर्बसाधारणको घरमा हरियो तरकारी कमै पाक्ने गरेको स्थानीयको भनाई रहेको छ । पछिल्लो केही दिन यता टमाटर एक सय ४० रुपैयाँ किलो बजारमा बिक्रि भईरहेको छ । पछिल्लो केहीदिनमा टमाटारमै किलोमा ४० रुपैया सम्म भाउ बढेको हो ।

८० रुपैया किलोमा हरियो काक्रो विक्रि हुदै आएको छ । काक्रोमा केही दिन यता २० देखी ३० रुपैया भाउ बढेको हो । जिल्लाको बजारमा एक सय ४० रुपैया किलो बिक्रि हुदै आएको काउलीमै किलोमै ३० रुपैयाले बढेको चन्द्रनिगाहपुरका स्थानीय तरकारी ब्यापारी नागेश्वर साहले जानकारी दिएका छन् । गत सोमबार ६० रुपैयाँ किलोमा बिक्रि हुदै आएको बन्दाको प्रतिकिलो मुल्य एक साता पहिला सम्म ३० रुपैयाँ किलो रहेको साहको भनाइ रहेको छ ।

५० रुपैयाँ किलोमा बिक्रि हुदै आएको लौकाको मुल्य पछिल्लो समयमा जिल्लाको बजारमा प्रतिकिलो ८० रुपैया सम्म पुगेको छ । ८० देखी एक सयमा बिक्रि हुदै आएको बोडीको प्रतिकिलो हिजो आज जिल्लाको बजारमा १ सय २० रुपैयाँ किलोमा आफुहरु किन्न बाध्य भएको चन्द्रपुर ८ का स्थानीय बासिन्दा अमृत सापकोटाको भनाई रहेको छ ।

पछिल्लो चार दिय यता प्याजको मुल्य समेत बढदै जान थालेको स्थानीय ब्यापारीको भनाइ रहेको छ । प्याजको प्रतिकेजि मुल्य अहिले बजारमा ६० रुपैया रहेको छ । प्याजको मुल्य समेत किलोमा १२ रुपैया बढेको हो । हरियो खुर्लानीको भाउ अकाशियर किलोको १६० पुगेको छ । केही दिन पहिलाको तुलनामा किलोमा खुर्लानीको भाउ ३० रुपैया बढेको हो । रायोको साग रौतहटको बजारमा ३० रुपैयाँ मुठोको पर्ने गरेको छ । जवकी एक साता पहिला सम्म त्यही साग २० रुपैया मोठोमा पाउने गरेको स्थानीय गृहणी इन्दिरा तिवारीले बताईन् । चाडबाड नजिकदै गर्दा लसुनको मुल्य बढेर किलोको २२० रुपया पगेको छ । एक हप्ता पहिला सम्म लसुनको मुल्य १८० रुपया किलोमा रौतहटको बजारमा पाइने गरेको थियो ।

रौतहटको बजारमा सर्लाहीको लालबन्दी र मकवानपुरको बिभिन्न स्थानका अलावा रौतहट जिल्लामै उत्पादन भएको हरियो तरकारी बिक्रि बितरण हुदै आएको छ । बजारमा प्रायः सबैखालका तरकारीको भाउ बढेको छ । सबैको भान्सामा प्रयोग हुने रातो आलु गएको हप्तासम्म प्रतिकिलो औसत मूल्य ४८ मा बिक्री हुने गरेको थियो ।

तर अहिले त्यसको भाउ बढेर ६९ रुपैया पुगेको छ । कोरोनाका कारण भएको लकडाउनले आपूर्ति कम हुदा भएका तरकारी पनि किसानले बजारसम्म लैजान नसक्दा आपूर्ति कम भएकोले भाउ बढेको जानकारहरुको भनाइ रहेको छ । एकातिर किसानले आफूले उब्जाएको तरकारीको उचित मूल्य पाउन सकेका छैनन् भने अर्कोतिर उपभोक्ताले चर्को मूल्य तिर्नुपरेको चन्द्रपुर नगर उद्योग बाणिज्य संघका पुर्व अध्यक्ष बासु अधिकारीको भनाइ छ ।

मानिसको आधारभूत आवश्यकता दुई छाक खाना र तरकारी खान पनि डराउनुपर्ने स्थिति सृजना हुनु दुःखद कुरा हो । यस्तो संकटको घडीमा गरिएको कृत्रिम मूल्यवृद्धि नियन्त्रण गर्नु सरकारको मुख्य दायित्व हो र सुपथ मूल्यमा खाद्य वस्तु उपभोग गर्न पाउनु नागरिकको अधिकार हो ।