काठमाडौँ, २ चैत । विगत वर्ष झैं यसवर्षपनि रंगहरुको पर्व होली हामी माझ आईपुगेको छ । पच्छिलो दुई बर्ष देखि कोरोना महामारीका कारण होली पर्व उत्साहजनक रुपमा मनाउन सकिएको थिएन । तर, यस वर्ष कारोना महामारीको प्रभाव कम भएसँगै एबीसी टेलिभिजनले होली बिशेष कार्यक्रम भव्य रुपमा आयोजना गर्ने भएको छ ।

वसन्त ऋतुको आगमनसँगै आपसी मेलमिलाप र सद्भावनाको सन्देश लिई आउने फागु पर्व परम्परागत रूपमा विभिन्न रङ र लोला खेली मनाउने प्रचलन रहेको छ । त्रेता युगमा दैत्यराज हिरण्यकश्यपले विष्णुभक्त आफ्ना पुत्र प्रह्लादलाई मार्ने उद्देश्यले ब्रह्माबाट आगोले छुन नसक्ने वरदान पाएकी आफ्नी बहिनी होलिकालाई प्रह्लादका साथ दन्किरहेको आगोमा पस्न लगाउँदा होलिका आफैँ भष्म भएकी तर भक्त प्रह्लादलाई आगोले छुन नसकेको पौराणिक कथा होली पर्वसँग जोडिएको छ । त्यसै बेलादेखि शक्तिको दुरूपयोग गर्ने पापी प्रवृत्तिको प्रतीक बनेकी होलिका मारिएको उपलक्ष्यमा होली खेल्ने परम्परा चली आएको मानिन्छ । यसैगरी, द्वापरयुगमा श्रीकृष्ण भगवानलाई मार्न कंशद्वारा पठाइएकी राक्षसनी पुतनाले आफ्नो विष स्तनपान गराउन लाग्दा असफल भई मारिएकी थिइन सोही अवसरलाई व्रजवासीले जलाई फागु महोत्सव मनाउने परम्परा चलेको पनि धर्मग्रन्थमा उल्लेख गरिएको छ । होलीले सम्पूर्ण नेपाली जनमा हर्षोउल्लास ल्याउने गर्दछ । रंग दलेर शुभकामना साटासाट गर्दै होली मनाईने गरिन्छ । सदियौंदेखि होली मनाइदै आएको छ ।

नेपालमा फरक फरक दिनमा होली मनाउने चलन रही आएको छ । पहाडमा होली मनाएको एक दिनपछि तराई मधेशमा होली मनाउने चलन रही आएको छ । होली पर्वको अवसरमा एक अर्कालाई रंग तथा अविर दलेर ठुलाबडा सँग आर्शिवाद लिने पनि चलन रही आएको छ । तराई मधेशमा भने होलीको अवसरमा विभिन्न लोक सांस्कृतिकका गित संगित गाएर गाँउ वस्तीमा युवाहरु भेला भएर होलिका दहनसँग जोगिरा गाएर होली मनाउने चलन छ ।