काठमाडौं, ११ माघ । रानीपोखरी पुनःनिर्माण गर्न गठित विज्ञ समूहले पोखरी प्रताप मल्लकालीन र बालगोपालेश्वर मन्दिर ग्रन्थकूटशैलीमा बनाउन सुझाव दिएको छ ।

समुहले स्थानीयवासी र नागरिक समाजसँग सुझाव सङ्कलन गरी काठमाडौँ महानगरपालिकालाई प्रतिवेदन बुझाउँदै मल्लकालीन शैलीमा निर्माण गर्न कुनै समस्या नहुने भएकाले सोहीअनुरुप निर्माण गर्न सुझाव दिएको हो ।

पुरातत्व विभागका पूर्वमहानिर्देशक विष्णुराज कार्कीको संयोजकत्वमा गठित समूहले पुनःनिर्माणका लागि तीन चरणका सुझाव दिएका छन् ।

पहिलो चरणअन्तर्गत प्रताप मल्लकालीन ग्रन्थकूट ९शिखर०शैलीको प्रमाणित रुपमा चारैतर्फका ढोकाका ठेलोसमेत प्राप्त भएको हुँदा र पुरानो कोरिएको चित्रसमेतका आधारमा मन्दिरको विस्तृत विवरण तयार गरी ग्रन्थकुट शैलीमा मन्दिर निर्माण आरम्भ गर्ने, पुरातात्विक उत्खननबाट पोखरीमा परम्परागत रुपमा सञ्चालित पानीका स्रोतको अनुसन्धान गरिनुपर्ने लगायतका सुझाव दिइएको छ ।

दोस्रो चरणअन्तर्गत पोखरीको ऐतिहासिक एवं पुरातात्विक स्वरुप नासिने गरी निर्माण भएका संरचना हटाई पुरानै स्वरुपमा निर्माण गर्न तथा हाल पोखरीको पूर्र्व र दक्षिणतर्फको आधा भागसम्म निर्माण गर्दा काटिएको पोखरीको डिल बचाउन सुझाव दिइएको छ ।

तेस्रो चरणमा जीर्णोद्धारपछि पोखरीको पुरातात्विक एवं ऐतिहासिक वातावरण कायम राखी सौन्दर्यीकरण गर्न तथा चारैकुनामा निर्मित मन्दिरलाई रानीपोखरीको हाताभित्र पार्ने र तिनको जीर्णोद्धार गरी परम्परागत सांस्कृतिक एवं धार्मिक क्रियाकलाप पुनःसञ्चालन गर्न भनिएको छ ।

विसं २०७२ वैशाख १२ गतेको भूकम्पले भत्किएको रानीपोखरी पुनःनिर्माणका लागि सुझाव दिन गत पुस १३ गते विज्ञ समूह गठन गरिएको थियो ।