काठमाडौँ ९ माघ ।  नेकपा माओवादी केन्द्र, जनता समाजवादी पार्टी र नेकपा एकीकृत समाजवादीबीच पुनः पार्टी एकताको कोशिश  शुरु भएको छ । गत हप्ता प्रधानमन्त्री तथा माओवादी अध्यक्ष पुष्पकमल दाहाल प्रचण्ड, जसपा अध्यक्ष उपेन्द्र यादव र एकीकृत समाजवादी अध्यक्ष माधवकुमार नेपालबीच छलफल भएको थियो ।

आइतबार बिहान एकीकृत समाजवादीको केन्द्रीय कार्यालय तीनकुनेमा जसपा र एकीकृत समाजवादीका वार्ता समितिबीच छलफल भएको थियो । दुई दलका बीचमा एकीकृत समाजवादीको तर्फबाट महासचिव बेदुराम भुसाल, उपमहासचिवद्वय विजय पौडेल र प्रकाश ज्वाला र जसपातर्फबाट अशोक राई र राजेन्द्र श्रेष्ठसहितका नेता वार्तामा सहभागी थिए ।

आइतबार नै दिउँसो एकीकृत समाजवादी र माओवादी केन्द्रको वार्ता टोलीबीच माओवादी मुख्यालय पेरिसडाँडामा वार्ता भएको थियो । जसमा माओवादीका नेता कृष्णबहादुर महरा, गिरिराजमणि पोखरेल, शक्ति बस्नेत सहभागी थिए ।

‘तीनै दलका अध्यक्षबीच गोप्य स्थानमा छलफलपछि वार्ता टोली सक्रिय भएको हो,’ वार्तामा सहभागी एक नेताले बताए । ‘नेताहरुबीच राष्ट्रपति निर्वाचनअघि नै एकता नभएर मोर्चा निर्माण गर्ने विषयमा तयारी रहेको छ । त्यसैअनुसार आइतबारबाट वार्ता सुरु भएको हो ।’

राष्ट्रपति निर्वाचन माघ २८ अघि नै गरिसक्नु पर्ने छ । संवैधानिक राष्ट्रपति भए पनि कुनै पनि दलको स्पष्ट बहुमत नभएको अवस्थामा सरकार निर्माणसहित विषयमा भूमिका महत्वपूर्ण हुने अनुमान गरिदै आएको छ ।

माओवादी अध्यक्ष पुष्पकमल दाहाल, जसपा अध्यक्ष उपेन्द्र यादव र एकीकृत समाजवादी अध्यक्ष माधवकुमार नेपालबीच छलफलपछि वार्ता टोली सक्रिय भएको हो ।

एमालेले राष्ट्रपति आफ्नो दलले पाउने गरी गठबन्धनभित्र सहमति रहेको दावी गर्दै आएको छ । वार्ता टोलीका सदस्य रहेका एकीकृत समाजवादी उपमहासचिव प्रकाश ज्वालाले ३ दलबीच एकताका लागि वार्ता सुरु भएको बताए । ‘तीनै दलबीच वार्ता सुरु भएको छ । पहिलो चरणमा दस्तावेजको आदान प्रदान गरेका छौं,’ ज्वालाले भने, ‘आजको वार्तामा पार्टी एकता, वर्तमान र भविष्यको राजनीतिक यात्रा, वार्ता समितिहरुको कार्य जिम्मेवारीलगायत विभिन्न वैचारिक राजनीतिक विषयमा छलफल हुनुको साथै दुई पार्टीबीच पार्टीका दस्तावेजहरु आदानप्रदान गरिएको छ । आजको वार्ता सकारात्मक रहेको र दुई पार्टीबिच सम्वादलाई निरन्तरता दिने सहमति भएको छ ।’

माओवादी केन्द्र र एकीकृत समाजवादीले आमनिर्वाचनअघि नै एकताका लागि एकता संयोजन समिति बनाएको थियो । प्रतिनिधिसभामा ३२ सीट रहेको माओवादी सरकारको नेतृत्व गरिरहेको छ भने १२ सीट रहेको जसपाले सत्ता गठबन्धनमा रहेको छ । मन्त्रालयको भागबन्डामा असन्तुष्टि जनाउँदै सरकारमा सहभागी भएको छैन । १० स्थान रहेको एकीकृत समाजवादी भने विपक्ष दलको रुपमा रहेको छ । चुनावअघिको कांग्रेससहितको गठबन्धनमा भने ३ वटै दल एकै स्थानमा रहेका थिए ।
वामपन्थीहरु बीच एकता गर्नु पर्ने भन्दै माओवादी नेता कृष्णबहादुर महराले कपिलवस्तु पुगेर नेत्र विक्रम चन्द विप्लवलाई समेत भेटेर आएका छन् । विप्लवको पार्टीको केन्द्रीय समितिको ब्रैठक कपिलस्तुमै जारी छ ।
शनिबार माओवादी र बाबुराम नेतृत्वको पार्टीका बीचमा पार्टी एकता गर्नेगरी अन्तिम तयारी गर्ने भन्ने सहमति भएको छ । माओवादी स्रोतका अनुसार माघ ११ गते हुने माओवादीको स्थायी समितिको बैठकले भट्टराईससंगको एकतालाई अनुमोदन गर्नेछ ।