काठमाडौं, ८ फागुन । विशेष आर्थिक क्षेत्र ९सेज० निर्धारण गरिएको रूपन्देहीको भैरहवामा उद्योग सञ्चालनका लागि जम्मा १३ वटा उद्योगीले मात्र निवेदन दिएका छन् । गत वर्ष भदौमा १९ वटा उद्योगले सञ्चालनका लागि सम्झौता गरेकोमा आईतबारसम्म १३ जनाको मात्र निवेदन पेश भएको सेजका प्रवक्ता सुन्दर थापाले जानकारी दिए ।

विशेष आर्थिक क्षेत्र विकास समितिले सूचना निकालेर सेजमा उद्योग स्थापना तथा सञ्चालनार्थ समझदारी पत्रमा हस्ताक्षर गरेका उद्योगीहरूलाई उद्योग सञ्चालनका लागि अनुमतिपत्रको निवेदन दिन सूचना प्रकाशन गरेको थियो ।

‘यहाँबाट उत्पादित वस्तुहरु ७५ प्रतिशत विदेश निकाशी गर्नुपर्ने प्रावधान छ । जसले गर्दा आउँछौं भन्ने उद्योगीहरू उत्पादित वस्तु निकासी गर्न सकिँदैन कि भन्ने डरले आउन हिचकिचाएको देखिन्छ’ उनले भने ।

सेज रोजगारी सिर्जना, निर्यात प्रवद्र्धन र औद्योगिक विकासमा कोशेढुंगा हुने बताइएको छ । तर उद्घाटन भएको ३ वर्ष पुग्दा पनि योजनालाई मुर्तरुप दिन सकेको छैन ।

उद्योग सञ्चालनको अनुमति माग गर्दै निवेदन दिनेमा सुगम नानो हर्बल प्रा.लि, आइडिएस इलेक्ट्रिक, इन्टरटेक, मिनरल वाटर ईण्डस्ट्रिज, किरण सुज, महेन्द्र कुमार गोयलको गोयल गु्रप अन्तर्गतको बर्न गार्मेन्ट उद्योग, ट्रान्स हिमालयन बेभरेज, गार्मेन्ट प्रोसेसिंग ईण्डस्ट्रिज, सिद्धार्थ पेट प्लाष्ट प्रालि, एक्सन पोलिमर प्रालि र सिद्धार्थ प्लाष्टलगायतका रहेका छन्।

उद्योग सञ्चालनको सम्झौता गरेका अन्य उद्योगमा जगदम्बा, गोल्छा, अरुणखोला बहुउद्देश्यीय सहकारी र चेतनशील मल्टी प्रपोज रहेका छन् । सम्झौता गरेर नआउने उद्योगीहरुको दर्ता खारेजी गरी नयाँ प्रकृया अघि बढाइने उनले बताए ।

सेजमा उद्योग स्थापनाका लागि अनुमति माग गरेका उद्योगी सिद्धार्थ गु्रपका निर्देशक राजेश कुमार अग्रवालले आफूहरु निकै उत्साहित रहेको भन्दै छिटोभन्दा छिटो सेजभित्र आवश्यकता अनुसारको विद्युत् उपलब्ध गराउन आग्रह गरे । ‘उद्योगीहरुको करोडौ रुपैयाँ लगानी हुने र देशकै पाइलट प्रोजेक्टका रुपमा सेज रहेकाले सफल बनाउने जिम्मेवारी सबैको हुन्छ,’ अग्रवालले भने ।

विशेष आर्थिक क्षेत्र सञ्चालन व्यवस्थापन मापदण्ड तथा कार्यविधि अनुसार विशेष आर्थिक क्षेत्रभित्र खाद्य उद्योग, कृषिजन्य हर्वल प्रोडक्ट, छालाको वस्तु, तयारी पोशाक, हस्तकला र धातु तथा प्लाष्टिक उत्पादन गर्ने उद्योगलाई प्राथमिकता दिइन्छ । सेज सञ्चालमा आए निर्यातजन्य उद्योगको स्थापनाले मुलुकको अर्थतन्त्रलाई सबल र आत्मनिर्भर बनाउन बल पुग्ने छ ।

सेजका उद्योगीहरुलाई पाँच वर्षसम्म आयकर छुट हुनेछ । घरबहालमा पहिलो वर्ष ५०, दोस्रो वर्ष ४० र तेस्रो वर्ष २५ प्रतिशत छुट हुने छ । कच्चा पदार्थ तथा मेसिन उपकरणको आयातमा तिरेको मूल्य अभिवृद्धिकर (भ्याट) फिर्ता हुनेछ । सेजभित्रका उद्योगमा प्रतिकूल असर पर्ने गरी बन्द हडताल गर्न पाइने छैन ।

५२ बिगाहा क्षेत्रफलमा फैलिएको सेजमा १४ सय देखि ३७ सय वर्ग मिटरसम्मका ६९ वटा प्लटहरू रहेका छन् ।  त्यस्तै सम्झौता भएको एक वर्षभित्रमा उद्योगले उत्पादन सुरु गरिसक्नुपर्ने हुन्छ ।