काठमाडौं । पाकिस्तानी प्रधानमन्त्री शाहीद खाकान अब्बासी सोमबार दुइदिने नेपाल भ्रमणमा आउँदै छन । अब्बासीको यो भ्रमण नयाँ सरकारलाई बधाईसंगै सार्कको सक्रियताका लागि छलफलमा आएको परराष्ट्रविद्हरु बताउँछन । पाकिस्तानले चालेको यो पहलमा सार्कको अध्यक्षता गरिरहेको नेपालले पनि कसैको दवावमा नआई सार्कको सक्रियता र छिमेकी मुलुकहरुले देखाएको चासोको फाइदा लिन पर्नेमा जोड दिएका छन ।

पाकिस्तानका प्रधानमन्त्री शाहीद खाकान अब्बासी दुईदिने नेपाल भ्रमणका लागि सोमबार नेपाल आउँदैछन । न त कुनै सभा सम्मेलन न त औपचारिक निमन्त्रणा, पाकिस्तानी प्रधानमन्त्री अब्बासी नेपाल आउने खबरले कुटनीतिक वृत्तमा तरंग ल्यायो परराष्ट्र मन्त्रालयलाई समेत औपचारिक जानकारी नभएको अब्बासीको भ्रमण मूलतः नेपालको निमन्त्रणामा भन्दा पाकिस्तानको इच्छाकै कारण भएको बुझ्न सकिन्छ । तर, इस्लामाबादबाट काठमाडौंंमा भ्रमणको सन्देश पुग्दै गर्दा यस्तको तरंग नयांदिल्ली सम्म पुगिसकेको छ । साउथ ब्लक र भारतीय कुटनीतिज्ञहरु कान ठाडो पारेर बसेका छन् ।

प्रधानमन्त्री अब्बासीको नेपाल भ्रमणको मुख्य उद्देश्य नवगठित सरकारलाई बधाई र शुद्ध द्विपक्षीय कूटनीतिक सम्बन्ध रहेको प्रधानमन्त्री केपी शर्मा ओली निकट स्रोतले जनाएको छ । सरकार गठन हुनुभन्दा अघि नै भारतीय विदेशमन्त्री सुस्मा स्वराज वेटिङ प्रधानमन्त्री ओलीलाई भेट गर्न नेपाल आएकी थिइन । तर, सरकार गठन भैसकेपछि कुनै पनि विदेशी राजनेताको पहिलो उच्चस्तरीय हो पाकिस्तानी प्रधानमन्त्रीको भ्रमण । प्रधानमन्त्री अब्बासीको भ्रमणलाई भारतीय विदेशमन्त्रीको काउन्टर रुपमा व्याख्या गर्छन्, पाकिस्तान मामिलाका जानकार एवं कुटनीतिज्ञ डाक्टर शास्त्रदत्त पन्त ।

त्यसो त, पाकिस्तानका प्रधानमन्त्रीले २४ वर्षपछि गर्न लागेको यो पहिलो औपचारिक नेपाल भ्रमण समेत हो । यसअघि सन् १९९४ मेमा पाकिस्तानकी तत्कालीन प्रधानमन्त्री बेनिजिर भुट्टोले द्विपक्षीय सम्बन्धलाई अघि बढाउन नेपाल भ्रमण गरेकी थिइन् । त्यसपछि पाकिस्तानका एक राष्ट्रपति र तीनजना प्रधानमन्त्रीले नेपाल भ्रमण गरेका थिए । ती सबै भ्रमण दक्षिण एसियाली क्षेत्रीय सहयोग संगठन (सार्क) शिखर सम्मेलनमा आधारित थियो । भ्रमणको मुख्य उद्देश्य बधाई दिने मात्र भनिए पनि अहिले नेपाल सार्कको अध्यक्ष राष्ट्र भएकाले अब्बासीको नेपाल भ्रमण सार्क शिखर सम्मेलन आयोजनाको लविङका लागि पनि भएको जानकारहरु बताउँछन ।

पाकिस्तानमा सन् २०१६ मा हुने भनिएको सार्क सम्मेलन भारत सहभागि नहुने भएपछि स्थगित भएको थियो । त्यसपछि निष्कृय जस्तै रहेको सार्कलाई सक्रिय गराउन यो भ्रमण केन्द्रित हुनसक्ने बताउंछन् परराष्ट्रविद् हिरण्यालाल श्रेष्ठ ।

एसियाली राष्ट्रहरुको संयुतm विकास र सहयोगका लागि स्थापना भएको सार्कलाई कुनै एउटा देशको कारणले निष्कृय गराउन हुंदैन । यसकारण, नेपालले सबैलाई मिलाएर मध्यस्ताकर्ताको भुमिका निर्वाह गरि यसबाट फाइदा लिन आवश्यकता भएको बताउंछन डाक्टर पन्त ।

सन् २०१४ मा भारतीय प्रधानमन्त्री नरेन्द्र मोदीको सपथपछि दक्षिण एसियाली राष्ट्रहरुमा धेरै सरकार फेरिए । तर नया“ प्रधानमन्त्रीलाई बधाई दिन तत्कालै अन्य देशका प्रधानमन्त्री सम्बन्धित देश पुगेका छैनन् । अहिले पाकिस्तानी प्रधानमन्त्री नेपालका नवनियुक्त प्रधानमन्त्रीलाई बधाई दिन नेपाल आउने भएपछि यसले दक्षिण एसियाको राजनीतिमा बेग्लै तरंग ल्याउने आंकलन समेत गरिएको छ ।

नेपाल र पाकिस्तानबीच सन् १९६० मार्च २९ मा कूटनीतिक सम्बन्ध गाँसिएपछि दुवै देशले एकअर्कालाई उच्च प्राथमिकता दिँदै आएका छन् । नेपालले १९६२ मा पाकिस्तानमा आवासीय दूतावास स्थापना गरेको हो । कूटनीतिक सम्बन्ध स्थापनासंगै दुवै देशबीच उच्चस्तरीय भ्रमण हुँदै आए पनि पछिल्लो दुई दशकमा भने यो गतिमा ‘ब्रेक’ लागेको थियो । यो भ्रमणले कस्तो खालको उपलब्धि दिन्छ त्यो भने भ्रमणपछिका दिनहरुले देखाउने नै छ ।