काठमाडौं २५ पुस । ललितपुर महानगरपालिका–५ महालक्ष्मीस्थानमा कार्यालय रहेको मितेरी सहकारी बचत तथा ऋण सहकारी संस्थाको रकम अपचलनका बारेमा प्रहरीको केन्द्रीय अनुसन्धान ब्यूरो सीआईबी०ले दोस्रोपटक नेपाली कांग्रेसका उपसभापति धनराज गुरुङसँग सोधपुछ गर्‍यो ।

सीआईबीको लामिजम्पाटस्थित कार्यालयमा बोलाएर मंगलबार करिब ५ घण्टासम्म गुरुङसँग सोधपुछ गरियो । कांग्रेस सांसद गुरुङमाथि सीआईबीले सहकारी रकम अपचलन र उनले तिरेको रकमको बारेमा सोधपुछ गरेको थियो । सीआईबीका प्रमुख तथा एआईजी दीपक थापाले पनि गुरुङमाथि मुख्य गरी रकम अपचलन र उनले तिरेको रकमबारेमा सोधपुछ गरिएको बताए ।

१२ बजे सीआईबीको कार्यालयमा पुगेका गुरुङ दिउँसो ५ बजेतिर बाहिरिएका थिए । गुरुङको नाममा भएको ऋण, रकम अपचलन, ‘कागजी डिभोर्स’, उनले तिरेको रकम लागायतबारेमा सीआईबीले गुरुङमाथि केरकार गरेको थियो । सो क्रममा उनले कानुनलाई सघाउन आफू तयार रहेको भन्दै सोधिएका प्रश्नहरूको जवाफ दिएको सीआईबीका अधिकारीहरू बताउँछन् ।

यता धनराजले मितेरी सहकारीमा तिरेको शंकास्पद रकमबारे पनि सीआईबीले केरकार गरेको छ । धनराजले एकै दिन ६८ लाख २६ हजार ९१४ रुपैयाँ सहकारीमा बुझाएका थिए ।

१७ वैशाख २०८१ मा चार वटा चेकमार्फत १४ लाख रुपैयाँका दरले ५६ लाख र एउटामा भने १२ लाख २६ हजार ९१४ रुपैयाँ रकम जम्मा भएको देखिएको छ । धनराजको तर्फबाट भनेर अरू नै व्यक्तिले एनएमबी बैंकको चेकमार्फत डिजोपिट गरेका थिए । यसबारे सीआईबीले उनीमाथि सोधपुछ गरेको थियो । ‘उहाँ ९धनराज० ले तिरेको रकमकाबारेमा पनि हामीले सोधपुछ गर्‍यौं । तर, उहाँले ऋण लिएको भनेर तमसुक दिएको भन्दै देखाउनु भएको छ,’ सीआईबीका एक अनुसन्धान अधिकारीले भने, ‘यसबारेमा ऋण लिएको भनिएका व्यक्तिविरुद्ध पनि सोधपुछ गर्छौं ।’

धनराजले व्यवसायी मीनबहादुर गुरुङसँग ९१ लाख रुपैयाँ ऋण लिएको दाबी गर्दै सीआईबीमा तमसुक देखाएका थिए । एकै व्यक्तिको बैंक खाताबाट एकै दिन रकम जम्मा हुँदा पनि एउटै चेकमार्फत रकम जम्मा नभई पटक–पटक जम्मा हुनु शंकास्पद देखिएको सीआईबीको भनाइ छ ।

फागुन २०७७ मा सहकारीको ऋण लिएको समयको एउटा कागजमा धनराजले हकवाला भनेर ज्योति गुरुङको नाम राखेका थिए । जबकि उनको २९ फागुन २०७६ मा डिभोर्स भएको थियो । उनको डिभोर्स समेत कागजीमात्रै रहेको आरोप लागेको छ ।

यसबारे नेकपा एमालेका नेता सूर्य थापा नेतृत्वको संसदीय छानबिन समितिले समेत आशंका गर्दै उनीहरू एकै साथ बस्ने गरको चर्चा भएको प्रतिवेदनमै उक्त विषय उल्लेख गरेको थियो ।

‘मितेरी बचत तथा ऋण सहकारीमा कार्यरत ज्योति गुरुङले पति धनराज गुरुङसँग सम्बन्ध बिच्छेद गरेर पनि एकसाथमै बस्ने गरेको चर्चामा छ’ प्रतिवेदनमा भनिएको छ । उनले डिभोर्स भएकी श्रीमतीलाई नै हकवाला भनेर ऋण लिएको पुष्टि भएपछि यो आरोपलाई समेत पुष्टि गरेको छ । यद्यपि सीआईबीको बयानमा भने उनले कागजी डिभोर्स नभएर साँच्चिकै डिभोर्स गरेको दाबी गरेका छन् ।

यता डिभोर्स हुनुअघि श्रीमतीको नाममा लिएको कर्जा समेत धनराजले तिरेका थिए । यसबारे सीआईबीले सोधपुछ गर्दा समेत सहकारीले नै कर्जा अलग(अलग गर्न नमानेको दाबी गरेका छन् । ‘त्यतिबेला संयुक्त नाममा रहेको कर्जा छुट्टा–छुट्टै गरिदिनु भन्दा मानेनन् । बाध्य भएर त्यो कर्जा आफैंले तिर्नु पर्‍यो,’ धनराजको दाबी छ ।

सहकारी रजिष्ट्रार कार्यालय हेटौंडाको पत्रको आधारमा अनुसन्धान अघि बढाएको सीआईबीले गुरुङमाथि पनि सोधपुछ गरेको हो । सहकारी रजिष्ट्रार हेटौंडाबाट महाप्रबन्धक ज्योति गुरुङ र उनलाई सहयोग गर्ने पूर्वकर्मचारीहरू ज्योतिबहादुर भण्डारी, सुजन शाक्य, हितमान थापा र प्रकाश थापाविरुद्ध त सीआईबीमा जाहेरी नै परेको छ । उनीहरूमध्ये धनराजकी पूर्वपत्नी ज्योति र ज्योतिबहादुर भण्डारीविरुद्ध त प्रहरीको अन्तर्राष्ट्रिय संगठन इन्टरपोलमार्फत रेड नोटिस नै जारी भएको छ ।

यसअघि २८ कात्तिकमा धनराजसँग सीआईबीले पहिलो पटक बयान लिएको थियो । त्यतिबेलाकै विषयहरू अहिले पनि गुरुङले दोहोर्‍याएको सीआईबीका अधिकारीहरू बताउँछन् । मितेरी सहकारीको १४ करोड ८१ लाख रुपैयाँ अपचलन भएको आरोप छ ।

२५ जनासँग सोधपुछ, भण्डारीविरुद्ध पहिल्यै ३ वटा ठगीका मुद्दा

मितेरी सहकारीको रकम अपचलनबारे सीआईबीले अहिलेसम्म २५ जनासँग सोधपुछ गरिसकेको छ । गत असोजदेखि अनुसन्धान अघि बढाएको सीआईबीले यसका केही ऋणीदेखि सञ्चालकसहित समितिमा रहेका व्यक्तिहरूसँग सोधपुछ गरेको छ ।

सहकारीका अध्यक्ष कुम्मराज राईदेखि जाहेरकर्ता बोधविक्रम थापा, सञ्चालक समितिका अन्य सदस्यहरू, संदिग्ध व्यक्ति गुरुङसहित २५ जनासँग सोधपुछ तथा घटना विवरण कागज गराएको एआईजी थापाले बताए । सीआईबीले उनीहरूसँग दुई चरणसम्म सोधपुछ गरेको छ ।

ठगी र क्रिप्टो गरी दुई फरक मुद्दामा अनुसन्धान अघि बढाएको सीआईबीले अहिलेसम्म दुई जनाविरुद्ध मात्रै पक्राउ पुर्जी जारी गरेको छ । बाँकीको हकमा भने सोधपुछ र बुझ्ने काम भएकाले अहिले नै पक्राउ पुर्जी गर्ने अवस्था नरहेको सीआईबीको भनाइ छ ।

यता रेड नोटिस नै जारी भएका ज्योति भण्डारीविरुद्ध भने यसअघि नै तीन वटा ठगीका मुद्दा रहेको खुलेको छ । प्रहरीको क्रिमिनल रेकर्ड सिस्टम ९सीआरएस० को रेकर्ड अनुसार उनीविरुद्ध जिल्ला प्रहरी परिसर काठमाडौंमा तीन वटा ठगीका मुद्दा देखिएको सीआईबीका एसपी तथा प्रवक्ता होविन्द्र बोगटीले बताए ।

‘पहिल्यै गरेको हस्ताक्षर धनराजकी पूर्वपत्नीले दुरुपयोग गरिन्’

सहकारीका अध्यक्ष कुम्मराजले पहिल्यै गरेर राखेको हस्ताक्षरलाई धनराजकी पूर्वपत्नी ज्योतिले दुरुपयोग गरेको देखिएको खुलेको छ । सीआईबीका एआईजी थापाका अनुसार कुम्मराजले विश्वास गरेर सबै जिम्मेवारी ज्योतिलाई दिएका थिए ।

त्यसका लागि कुम्मराजले सहकारीका लागि चाहिने आफ्नो हस्ताक्षरहरू समेत पहिल्यै गरेर राखेका थिए । उक्त हस्ताक्षर दुरुपयोग गरेर सहकारीको रकम हिनामिना गरेको देखिएको उनको भनाइ छ । कुम्मराजले पनि बयानमा उक्त कुरा खुलाएका छन् ।

एआईजी थापा भन्छन्, ‘कुम्मराजले विश्वास गरेर सबै जिम्मेवारी ज्योतिलाई दिने गरेका रहेछन् । केही स्लिपहरूमा समेत हस्ताक्षर गरेर छाडेका रहेछन् । सहकारीमा रकम डिपोजिट गर्न आउनेहरू रकम आधाजसो सहकारीमा जम्मा गरेर आधा ज्योति आफैंले अपचलन गर्ने गरेको देखिन्छ ।’

यो पनि पढ्नुहोस
कुम्मराजले पहिल्यै हस्ताक्षर गरेर छाडेको स्लिपमा डिपोजिट गर्न आएको रकम ९मानौं २ लाख० उल्लेख गरेर बचतकर्तालाई दिने तर सहकारीको सिस्टममा भने उक्त बचतकर्ताबाट आधामात्रै ९१ लाख० रकम जम्मा भएको देखाउने गरेको एक अनुसन्धान अधिकारी बताउँछन् ।

यसरी ठगी गरेको रकम सहकारीले अडिट गर्दा खुलेको थियो । त्यसपछि उक्त मितेरी सहकारीले नै कारबाहीका लागि भन्दै सहकारी रजिष्ट्रार कार्यालय हेटौंडालाई पत्र लेखेको थियो । हेटौंडाको पत्र सीआईबी आएपछि प्रहरीले अनुसन्धान थालेको हो ।

यसरी अपचलन गरिएको रकम क्रिप्टोमार्फत विदेश पुर्‍याउने गरेको पाइएको सीआईबीको अनुसन्धानबाट खुलेको छ । यसको मुख्य सहगोगी भएर ज्योतिबहादुर भण्डारीले काम गरेको देखिएको छ । बचतकर्ताको रकमबाट उनीहरू थाइल्यान्ड समेत घुमफिर गर्न गएको खुलेको छ । अहिले भने ज्योति गुरुङ अमेरिका र ज्योतिबहादुर भण्डारी श्रीलंका पुगेको सीआईबीको आशंका छ ।

कसरी जोडिए धनराज रु

बेलायती र भारतीय सेनामा काम गरेका पूर्वसैनिकहरू मिलेर ललितपुर महानगरपालिका–५ महालक्ष्मी स्थानमा कार्यालय रहने गरी मितेरी सहकारी खोलेका थिए ।

सहकारीको सावाँ ब्याज गरेर १४ करोड ८१ हिनामिना गरेको आरोप छ । ठगी आरोपको केन्द्रमा धनराजकी पूर्वपत्नी ज्योति छिन् । धनराज र ज्योतिको विवाह २०५१ सालमा भएको थियो । ज्योति २०५७ सालदेखि यो सहकारीमा आवद्ध थिइन् । सुरुमा उनी बचत संकलकको रूपमा सहकारीमा प्रवेश गरेकी थिइन् । २०७० मा सहकारीको कोषाध्यक्ष बनिन् । त्यसपछि महाप्रबन्धक भइन् । महाप्रबन्धक बनेपछि उनले रकम हिनामिना गरेको आरोप छ । त्यसका लागि उनलाई पूर्वकर्मचारी ज्योतिबहादुर भण्डारी मुख्य सहयोगीको भूमिका निभाएको खुलेको छ । घोटाला गरेको रकम फिर्ता गर्न पटक(पटक ताकेता गर्दा समेत रकम फिर्ता नगरी ज्योति फरार भएको आरोप छ ।

रकम हिनामिना भएको थाहा हुँदा कांग्रेस उपसभापति धनराज र ज्योतिको डिभोर्स भइसकेको थियो । अदालतको रेकर्डमा सम्बन्ध बिच्छेदको मुद्दा परेको देखिन्छ । २८ फागुन २०७६ मा श्रीमती ज्योतिले धनराजलाई प्रतिवादी बनाउँदै ललितपुर जिलला अदालतमा सम्बन्ध बिच्छेदको मुद्दा हालेकी थिइन् ।

भोलिपल्टै न्यायाधीश डा। रमेशप्रसाद रिजालको इजलासले सहमतिमा सम्बन्ध विच्छेद भएको फैसला गरे ।

तर, सहकारीका अध्यक्ष कुम्भराजले भने संसदीय समितिमै सम्बन्ध विच्छेदमाथि शंका गरेका छन् । रकम हिनामिना भएको खुलेपछि आफूसहित सहकारीका व्यवस्थापन टिमले धनराज र ज्योतिसँग पटक(पटक कुरा गरेको उनको दाबी छ । धनराजले हिसाब मिलाउने प्रतिबद्धता जनाएको उनको दाबी छ ।

धनराज स्वयंले उनलाई फोन गरेर रकम फिर्ता गरिदिन भनेको कुम्भराजले संसदीय विशेष समितिमा बताएका थिए । तर, पछिल्लो समय कांग्रेस उपसभापतिले ‘मैले त डिभोर्स गरेँ अब मसँग सहकारीको रकमको कुनै सम्बन्ध हुँदैन’ भनेपछि यो विषय कुम्मराजले बाहिर ल्याएका थिए । त्यसपछि धनराज पनि सहकारी अपचलनमा संलग्न भएको आरोप लाग्दै आएको छ । उनीमाथि अनुसन्धानमा ढिलाइ गर्दै उन्मुक्ति दिन खोजेको आरोप छ ।