काठमाडौँ , ११ चैत । आगामी चैत १५ र १६ गते काठमाडौंमा आयोजना हुने दोस्रो अन्तर्राष्ट्रिय लगानी सम्मेलनका लागि लगानी बोर्डले सरकारी क्षेत्रबाट ५० वटा र निजी क्षेत्रबाट १८ वटा आयोजनालाई प्रोजेक्ट बैंकका रुपमा राख्ने भएको छ।

लगानी सम्मेलनमा मुख्यतया यिनै आयोजनाहरुमा आधारित भएर सरकारले विदेशी लगानीका लागि आह्वान गर्न लागेको हो। सरकारी क्षेत्रबाट छनोट भएका आयोजनाहरुमा पनि पर्यटन क्षेत्रका ९ वटा आयोजना रहेका छन्।

विदेशी लगानीकर्ताले नेपालका कुन आयोजनामा लगानी गर्ने भनेर अन्योल नहोस् भन्ने उद्देश्यले प्रोजेक्ट बैंक तयार पारिएको लगानी बोर्डको कार्यालयले जनाएको छ। लगानी सम्मेलनमा आउने लगानीकर्ताहरुले यी आयोजनाहरुका बारेमा विस्तृत जानकारी पाउने छन् भने उपयुक्त ठानेमा लगानीका लागि सम्मेलनमार्फत नै प्रतिवद्धता जनाउनेसमेत अपेक्षा गरिएको छ।

पर्यटन पूर्वाधार विकासमा सरकारले अगाडि सारेको एउटा आयोजना हो ‘दमौली मल्टिपर्पोज आयोजना’। यो आयोजना तनहुँ जिल्लामा रहने छ। यो परियोजना जलाधार पर्यटनसँग जोडिएको छ। यो परियोजना पिपिपी मोडलमा सञ्चालन गर्न सरकारले लगानीको लागि प्रस्ताव गर्न लागको हो। यो परियोजनाको कुल लागत ५५ मिलियन अमेरिकी डलर रहने छ।

यसैगरी दोलखा फिल्म सिटी परियोजना पनि सरकाले अगाडि बढाएको छ। यसको लागत २ अर्ब ७५ करोड रहने छ।

साथै लुम्बिनी स्मार्ट सिटी परियोजना पनि तय भएको छ। यसको लगानी ४ अर्ब २९ करोड रहेको छ। साथै शे–फोक्सुन्डो रिसोर्ट निर्माणका लागि सरकारले ११ अर्बको लगानी प्रस्ताव माग गर्ने भएको छ।

जानकी क्षेत्र विशेष आयोजनाको लागि २ अर्ब २० करोड र तालतलैया पर्यटन विकास पूर्वाधार निर्माणका लागि ४ अर्ब ५१ करोड रुपैयाँको लगानी प्रस्ताव सम्मेलनमा गर्ने सरकारको तयारी छ।

यसैगरी स्की रिसोर्ट मनाङ निर्माणका लागि पनि ११ अर्ब रुपैयाँको प्रस्ताव लगानी सम्मेलन गर्ने सरकारको तयारी छ। यसैगरी सरकारले धनगढी क्षेत्रीय अन्तर्राष्ट्रिय विमानस्थलको स्तरोन्नतिका लागि २८ अर्ब ३८ करोड रुपैयाँको प्रस्ताव अगाडि बढाउन लागेको छ।

यसैगरी, विराटनगर क्षेत्रीय अन्तर्राष्ट्रिय विमानस्थलका लागि पनि ४० अर्ब ४ करोड रुपैयाँको प्रस्ताव सम्मेलनमा सहभागी लगानीकर्तामाझ प्रस्तुत गर्ने भएको छ। यसैगरी खप्तड पर्यटन विकासका लागि पनि सरकारले १ सय ८७ मिलियन रुपैयाँको लगानीको लागि प्रस्ताव गर्ने भएको छ।