बुटवल, १६ जेठ /
अघिल्लो वर्ष प्रस्तुत गरिएको बजेटबाट खासै उत्साहित बन्न नसकेका नेपालीहरु यस वर्षको बजेटबाट भने केहि उत्साहित देखिएकाछन् । अघिल्लो वर्ष बजेट प्रस्तुत गरे लगत्तै अर्थमन्त्री युवराज खतिवडा पार्टी पङ्ती भित्र र बाहिरबाट समेत आलोचित बनेका थिए । अघिल्लो वर्षको आलोचनालाई चिर्दै यस वर्ष भने केहि लोकप्रिय कार्यक्रमहरु सहित खतिवडाले बजेट प्रस्तुत गरेकाछन् ।
३ वर्ष पहिला अर्थमन्त्रीका हैसियतले बजेट प्रस्तुत गर्दा बजेटको ठुलो हिस्सा बुटवल र लुम्बिनीमा परेको भन्दै तत्कालिन एमालेका तर्फबाट अर्थमन्त्री बनेका नेकपा महासचिव बिष्णु पौडेल निकै चर्चामा थिए । यस पटकको बजेटमा पनि रुपन्देही सहित ५ नम्बर प्रदेशले संघिय सरकारको उल्लेख्य बजेट हात पार्न सफल भएको छ ।
जेठ १५ गते संघिय सरकारका अर्थमन्त्री युवराज खतिवडाले प्रस्तुत गरेको आर्थिक बर्ष २०७६/०७७ को बजेटमा प्रदेश नम्बर ५ र त्यसको राजधानी रुपन्देही तथा आसपासका परियोजनामा उल्लेख्य बजेट बिनियोजन भएको छ ।
प्रस्तुत भएको बजेटमा राष्ट्रिय गौरवको आयोजनाको रुपमा रहेको गौतमबुद्ध अन्तराष्ट्रिय विमानस्थलका लागि सबैभन्दा बढी बजेट बिनियोजन भएको छ । जसका लागि ३ अर्ब ३४ करोड बजेट विनियोजन गरिएको छ । पहिलो चरणको काम सम्पन्न गरी अन्तराष्ट्रिय उडान सुरु गर्नको लागि उक्त बजेट विनियोजन गरिएको हो ।
अर्थमन्त्री खतिवडाले प्रस्तुत गरेको बजेटमा तिलौराकोट, लुम्बिनी, देबदह र रामग्राम क्षेत्रलाई समेटी बृहत लुम्बिनी एकिकृत विकास गुरुयोजना तर्जुमाको लागि १ अर्ब बजेट विनियोजन गरिएको छ ।
यस संगै तिलोत्तमा नगरपालिकामा दुईसय विगाह जग्गा छुट्टयाई अगाडी बढाईएको बुटवल मेडिकल कलेजको गुरुयोजना निर्माणको लागि १० करोड बजेट विनियोजन गरिएको छ । बृहत बुटवलमा निर्माणाधिन अन्तराष्ट्रिय सम्मेलन केन्द्र र अन्तराष्ट्रिय प्रदर्शनी केन्द्र लगायतका आयोजनाहरु बजेटको प्राथमिकतामा परेका योजनाहरु हुन ।
बजेटले सिद्धार्थ राजमार्गको सिद्धबाबा दोभानमा सुरुङमार्ग निर्माणका लागि डिपीआर तयार गर्ने र कार्यप्रारम्भ गर्ने समेत कार्यका लागि एक अर्व रकमको ब्यवस्था गरेको छ । सरकारले प्रस्तुत गरेको बजेटले केहि आशाका किरण पलाएको रुपन्देही उद्योग संघका पुर्व अध्यक्ष बोनीन पिया बताउंछन् ।
प्रस्तुत बजेटमा कालीगण्डकी तिनाउ डाइभर्सन बहुउदेश्यीय आयोजना, राप्ती कपिलबस्तु डाइभर्सन बहुउदेश्यीय आयोजना, ५ नंं प्रदेशमा नयाँ कृषि अनुसन्धान केन्द्र स्थापना, पाल्पा जिल्लामा मौसम मापन उपकरण (मौसमी राडार) जडान, ऐतिहासिक जितगढी किल्लाको संरक्षण, रुपन्देहीको मोतिपुर र बाँकेको नौवस्तामा औद्योगिक क्षेत्र निर्माणकार्यमा तिब्रता तथा बुटवल बेलहिया र कोहलपुर जमुनाहलाई औद्योगिक कोरिडोरको रुपमा बिकास गर्ने योजना पनि बजेटमा समेटिएका छन् । बजेटमा धेरै आशाका कुराहरु भएपनि त्यसको कार्यान्वयनमा भने आशंका रहेको भनाई छ नेपालगन्ज उद्योग बाणिज्य संघका उपाध्यक्ष दुर्गा प्रसाद भण्डारीको ।
त्यस्तै नवलपरासीको धौबादीबाट फलाम उत्पादन सुरु गरिने, भैरहवा र नेपालगन्जमा अन्तराष्ट्रिय चेकपोस्ट स्थापना, नौमुरे बहुउदेश्यीय आयोजना सुरु, बुटवल देखि गोरखपुर अन्तरदेशीय बिद्युत प्रशारण लाइन निर्माण, बुटवल नारायणगढ सडक खण्डको निर्माण कार्यमा तिब्रता दिदै पुर्व र पश्चिम खण्डको डिपिआर सम्पन्न गरि निर्माणकार्य आरम्भ गरिने उल्लेख गरिएको छ ।
बुटवल सिद्धर्थनगर र नेपालगन्ज कोहलपुरलाई मेघा सिटीमा बिकसीत गर्न गुरुयोजना बमोजिम पुर्वाधार निर्माणको कार्यलाई बजेटमा प्राथमिकता दिईएको छ । बाँकेमा विशेषगरी १० ठुला आयोजनालाई महत्वका साथ हेरिएको छ । यहाँका दुई ठुला शहर नेपालगन्ज र कोहलपुरलाई मेघा सिटीका रुपमा विकास गर्न सम्भाव्यता अध्ययन गर्ने बजेटमा समावेश गरिएको छ । त्यस्तै नेपालगन्ज भन्सारमा अन्तराष्ट्रियस्तरको एकिकृत भन्सार जाँच चौकी निर्माण गर्ने, भेरी अस्पतालको स्तरोन्नती, खजुरास्थित सुशील कोइराला प्रखर क्यान्सर अस्पतालको पूर्ण सञ्चालन, नेपालगन्ज विमानस्थलको स्तरोन्नती, नेपालगन्ज–सुर्खेत रत्न राजमार्गलाई चार लेनको बनाउने र बुटवल–कोहलपुर रेलवे लाइन निर्माण अघि बढाउने गरी यी आयोजनालाई प्राथमिकतामा राखेरै सरकारले बजेटमार्फत सम्बोधन गरेको छ ।
सरकारले अघि सारेको बजेटलाई बिपक्षिदल कांग्रेस ५ नम्बर प्रदेशका नेता युवराज गिरीले पनि सकारात्मक भनेकाछन् । सपनाहरु बोकेको बजेट आएको टिप्पणी गर्दै गिरीले कार्यान्वयनमा भने धेरै आशंकाहरु रहेको बताउंछन् ।
यसवर्षको बजेटले सबै भन्दा बढी महिला र जेष्ठ नागरिकहरुलाई उत्साहित बनाएको छ । अघिल्लो वर्ष बृद्धभत्ता नबढाएको आलोचना खेपेका अर्थमन्त्रीले बृद्धबत्ता, एकल महिला भत्ता, स्कुले किशोरीहरुलाई सेनेटेशन प्याड जस्ता लोकप्रिय कार्यक्रम अगाडी सारेको बुटवलकी नागरिक अगुवा देबी वाग्ले बताउंछिन् ।
बजेट प्रस्तुत भएको केहि दिनसम्म राम्रो भएको प्रतिक्रिया आए पनि बजेट राम्रो भए नभएको वास्तबिक आंकलन भने त्यसको कार्यान्वयन पछिमात्र थाहा हुने छ । बजेट जस्कालागि बनाईएको हो त्यहि वर्ग सम्म पुग्न सकोस् हाम्रो पनि शुभकामना ।