काठमाडौं, ५ असार ।  नेपाल वायुसेवा  निगमको स्पष्ट व्यवसायिक योजना नहुदा निगम निरन्तर घाटामा छ । व्यवसायिक योजनाबिनै निगमले वाइड बडी, न्यारो वडी जहाज खरिद गरे पनि निमग उठ्नै नसक्ने गरी थला पर्दै गएको छ ।

नेपाल वायुसेवा निगमसँग कुनै व्यवसायिक योजना नहुँदा दिनप्रतिदिन खस्कदो अवस्थामा छ । कुनै व्यवसायिक योजना विहिन् जहाज खरिद गर्दा होस अथवा व्यवस्थापकिय सुधार नहुदा निगम समस्याको चाङमा फस्दै गएको हो ।

नेतृत्वको कार्यक्षमता र दुरदर्शी योजना नहुदा निगम व्यवसायीक क्षमता हासिल गर्न सकेन । ६ दशक लामो इतिहास बोकेको निगम हालसम्म घाटाको विवरण सार्वजनिक गर्न बाध्य छ । एयर सेवा निजी क्षेत्र नाफामा चलिरहेको बेला सरकारी निगमको अवस्था भने निकै टीठ लाग्दो छ । निगमसँग घरेलु उडानका लागि ९ जहाज छन् । जस मध्ये सातवटा जहाज उडान गर्न सक्ने अवस्थामा छैनन् । २ वटाले उडान भरिरहेका छन् । पाइलट अभावको कारण जहाज उडाउन नसकिएको निगमको वाहाना छ ।

आन्तरिक व्यवस्थापन असक्षमताका कारण कयौँ पाइलट जिम्मेवारी विहिन जस्तै छन् । आन्तरिक उडानका सातवटा जहाज ग्राउन्डेड हुँदा निगमलाई दैनिक २१ लाख र मासिक ६ करोड ३० लाख घाटा बेहोर्न परेको छ । निगमले आजसम्म कुनै पनि व्यवसायिक योजना अघि सार्न सकेको छैन । जुन जोगी आएपनि कानै चिरेको भनेजस्तै निगमको नेतृत्वमा जो आएपनि निरन्तर घाटामा जाने गरेको छ । आन्तरिक उडानका लागि पाँच वर्ष अघि चीनबाट खरिद गरिएका ६ जहाज मध्ये ५ वटा जहाज ६ महिनादेखि थन्किएका छन् । कामदारको लागि भिडभाड हुने दुबईमा उडान बढाउनुपर्नेमा उल्टो घटाइएको छ ।

त्यस्तै कोरिया र जापानमा उडान भर्ने भनेर अहिलेसम्म पनि निगमको असक्षमताका कारण अहिलेसम्म पनि उडान सुचारु हुन सकेको छैन । निगम व्यवस्थापकको अकर्मण्यताका कारण जापानको नारिता उडान संचालन गर्नु पर्नेमा ओसाकामा उडान संचालन गर्नाले सेवामा प्रगति भएन । जापानको नारिता नेपालीहरुको सघन बस्ती क्षेत्र हो । जहाँ सेवा सुचारु भएको भए निगमले लाभ लिन सक्नेथियो । तर निगम डुबाउने निगम भित्रकै माफियाका कारण जापान उडानको बिचल्ली छ । तर निगमका जिम्मेवारहरु यो विषयमा सहमत छैनन् ।

भएका जहाज नचलेर थन्किएका छन् । पाइलट अभाव भनिरहेको छ निगम आफैँ । अझ आगामी दिनमा दुइवटा जहाज किन्ने योजना रहेको निगमको भनाइ छ । चलाउन नसकिने जहाज किन अर्बौ खर्च गरेर किन्नु पर्यो ? कुरा स्पष्ट छ । जहाज चलाएर नागरिकलाई सेवा सुविधा दिनुभन्दापनि आर्थिक दोहन गर्ने मुख्य रुपमा लिएको छ निगम नेतृत्वले । खैर जहाज खरिदलाई उसले भिजिट नेपाल ट्वान्टी ट्वान्टीको लागि पर्यटक भित्राउन भन्न छोडेको छैन ।

यता नेपाल वायुसेवा निगमले तीन दशकदेखि उडाइरहेको बोइङ ७५७ जहाज बिक्री गर्ने तयारी गरिरहेको छ । मर्मत गरेर उडाउनुभन्दा बेच्नु नै फाइदा भएकोले बेच्न लागेको निगम बताउँछ । तर अघिल्ला वर्षहरुमा कौडीको भाउमा जहाज बेचेर अनियमितता भएको नागरिक समाजको दावी छ ।

घरेलु होस या बाह्रय क्षेत्रमा निगम लगभग असफल जस्तै छ, मुलतः दुरदर्शी व्यवसायीक योजनाको अभावमा ६ दशकसम्म पनि विमानसेवा संचालनबाट नाफामा जानै सकेन ।

निगम नेतृत्व सधै विवादमा तानिदै आयो ।नेपालको ध्वजावहाक विमान सेवा जर्जर अवस्थमा गुज्रिदै गयो । नेपाल वायुसेवा निगममाथिको चरम राजनीति हस्तक्षेपले धराशायी बन्दै गएको हो । अन्त अदुरदर्शीको निगम नेतृत्वका साथै नीतिगत सुधारमा राज्य लाग्न नसके नेपाल वायु सेवा निगम मुलुक डुबाउने सेतो हात्तीमै थन्किने निश्चित छ ।