काठमाडौं, १७ असार । नेकपा अध्यक्ष पुष्पकमल दाहाल प्रचण्डका दिवंगत छोरा प्रकाश दाहालको ३८ औं जन्म दिन । प्रकाशको स्मृतिमा स्थापित प्रकाश दाहाल प्रतिष्ठानले काठमाडौंमा एक कार्यक्रम गरी पाँच जना व्यक्तिलाई सम्मान गरेको छ । प्रष्तिठानले आगामी दिनमा नेपालको पर्यटन र हिमाल आरोहणको बिकास र बिस्तारमा सहयोग गर्ने बताएको छ ।

पूर्व प्रधानमन्त्री तथा नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डका दिवंगत छोरा प्रकाश दाहालको ३८ औं जन्मजयन्ती । दाहालको स्मृतिमा स्थापित प्रतिष्ठानले प्रकाश दाहाल साहासिक सगरमाथा सम्मान–२०७६ मार्फत सगरमाथा आरोहण र अन्य क्षेत्रसँग सम्बन्धित व्यक्तित्वहरुहरुलाई सम्मान गरेको छ ।

पूर्व प्रधानमन्त्री पुष्पकमल दाहाल प्रचण्डको हातबाट कोरियन नागरिक ओम होङ गिल, ज्ञानेन्द्रकुमार श्रेष्ठ, माया शेर्पा, छिरिङ थुन्दु शेर्पा र आङ सार्कि शेर्पालाई सम्मान पत्रसहित सम्मान गरिएको छ । त्यस्तै, रुकुम सानोभेरीका क्यान्सर पिडित पूर्व जनमुक्ति सेना धर्मबहादुर ओलीलाई १ लाख रुपैँया र गोरखा निवासी क्यान्सर पिडित १३ वर्षिया बालिका पल्लबी श्रेष्ठलाई १ लाख रुपैँया सहयोग गरिएको छ ।
२०३८ साल असार १८ गते जन्मिएका प्रकाश दाहालको ३६ वर्षको उमेरमा २०७४ मंसिर ३ गते हृदयघातको कारण अल्पायुमै निधन भएको थियो । उनको परिचय प्रचण्डका छोराको रुपमा मात्र सिमित नभै राजनीतिक व्यक्तित्व समेत रहेको थियो । २०५७ सालमा कक्षा १२ को पढाइ सकेपछि तत्कालीन नेकपा माओवादी पार्टीसँग आबद्ध भइ भुमिगत जिवन बिताएका प्रकाशले पार्टी अध्यक्ष प्रचण्डको सचिवालयको जिम्मेवारी लिएका थिए । प्रकाशले सुचना, सञ्चार व्यवस्थापन, सचिवालय र अध्यक्षको सुरक्षा घेरा सम्हाल्ने काम जनयुद्धकालमा गरेका थिए भने पार्टी शान्ति प्रक्रियामा आइसकेपछि बाबु प्रचण्ड प्रधानमन्त्री बन्दा स्वकिय सचिवको जिम्मेवारी निभाएका थिए ।

प्रतिष्ठानले आगामी वर्षहरुमा पनि आरोहणको विभिन्न क्षेत्रमा योगदान दिने व्यक्तित्वहरुलाई सहयोग तथा सम्मान गर्ने प्रतिवद्धता व्यक्त गरेको छ । वि.सं. २०६९ सालको जेठ महिनामा कृष्ण केसीको नेतृत्वमा प्रकाश दाहाल लगायतको युवा नेताहरुको समुहले सगरमाथा आरोहण गरेको थियो । आरोहणमा प्रकाश दाहालको महत्वपूर्ण भुमिका रहेको थियो । उनले सगरमाथाको चुचुरोमा नेपालको राष्ट्रिय झण्डा र कम्युनिष्ट पार्टीको झण्डा फहराएका थिए । राजनीतिक व्यक्तित्व भएपनि सगरमाथाको आरोहण गरेर उनले किर्तिमानी कायम गरेको पूर्व प्रधानमन्त्री माधवकुमार नेपाल बताउँछन् ।

प्रकाश दाहाल जीवनको उत्तरार्धमा बाबु प्रचण्डको सचिवालयलाई व्यवस्थित बनाएका थिए । उनको व्यवस्थापकीय क्षमता प्रशंसायोग्य बन्दै गएको थियो । भुमिगतकालदेखि शान्ति प्रक्रिया र सरकारको नेतृत्वसम्म आइपुग्दा प्रकाशले आफ्नो फरक फरक परिस्थितिमा पनि व्यवस्थापकिय कला देखाएका थिए । उनको सम्बन्ध आफ्नो पार्टीभित्र मात्र नभइ अन्य पार्टीका नेता, कार्यकर्तामाझ पनि उत्तिकै थियो । उनले पार्टी हेडक्वाटरको सचिवालयमा बसेर पार्टीलाई अन्य पार्टीसँगको सम्बन्ध सुमधुर बनाउने काममा समेत भुमिका खेल्ने गरेका थिए । उनको व्यवस्थापकिय पक्षबाट आम मान्छेहरुले शिक्षा लिनुपर्ने राजनीतिक दलका नेताहरुबताउंछन् ।

हरेक मान्छेको व्यक्तिगत जिवनमा केही न केही खोट अवश्य पनि हुन्छ । प्रकाश दाहालको जिवनमा पनि पारिवारिक रुपमा केही कमि कमजोरीहरु भएका हुन् । तर उनले पारिवारिक जिवनको कमिकमजोरीलाई ढाकछोप गरेनन् र सामाजिक राजनीतिक काममा निरन्तर क्रियाशिल रहिरहे । उनको राजनीति प्रतिको सक्रियताबाट आजको युवापुस्ताले पनि केही सिक्नुपर्छ ।