काठमाडौं, ४ साउन । वाणिज्य आपूर्ति तथा उपभोक्ता संरक्षण विभागले कालीमाटी, बल्खुको तरकारी तथा फलफुल बजारको अनुगमन गरेको छ । तरकारीको मूल्य अस्वभाविक रुपमा बढाइएको गुनासोपछि शुक्रबार बिहान ३ बजे विभागले आकस्मिक अनुगमन गरेको हो । अनुगमनबाट तरकारी व्यवसायीलाई कारवाहीको सिफारिस गरेको छ ।

बल्खु र कालीमाटीको तरकारी तथा फलफूल बजारमा वाणिज्य विभागले आकस्मिक अनुगमन गरेको छ । शुक्रबार बिहान ३ बजे नै अनुगमन गर्न पुगेको विभागले कालीमाटीका ७ र बल्खुका ८ गरी १५ वटा तरकारी पसललाई अनुगमन टोलीले कारबाहीको लागि सिफारिस गरेको छ ।

बिलबिजकविनै कारोबार गरेको तथा बिचौलियको काम गरेको भेटिएपछि टोलीले कारवाही सिफारिस गरेको हो । किसानसंग तरकारी खरिद गरेको बिल बिजकबिनै बजारमा तरकारी तथा फलफूलको बिक्री वितरण भइरहेकाले कति मूल्य बढाइएको हो ? भन्ने यकिन गर्नै नसकिएको विभागको अनुगमनको टोलीले जनाएको छ ।

बाढी र पहिरोलाई कारण देखाउ“दै पछिल्लो केही दिनदेखि तरकारी तथा फलफूलको मूल्य एक्कासि बढाइएको छ । बिल बिजकबिनै बजारमा तरकारी तथा फलफूलको बिक्री वितरण भएकोप्रति कालमाटी र बल्खुका तरकारी व्यापारीहरु भने असन्तुष्ट छन् । उपभोक्ताहरु जहिले पनि हतारहतारमा हुने गर्दा पनि बिल काट्न नभ्याईएको भन्दै व्यापारीहरु टार्ने वाहाना गर्छन् ।

देशमा ठूला–ठूला घोटाला गर्नेहरुलाई कारबाही गर्न नसकेको र सामान्य तरकारी बेच्ने व्यापारीहरुले चाही गाँजा, चरेस नै बेचे झैं अनुगमन गरेको भन्दै व्यापारीहरु असन्तुष्टी पोख्छन् । तरकारी तथा फलफुल किसानदेखि ३, ४ चरण पछि मात्रै बजारसम्म आईपुग्ने हुँदा तरकारीको मूल्यमा वृद्धि हुने गरेको उनीहरुको भनाई छ ।

भारत लगायत विदेशबाट स्वदेश भित्र्याईने तरकारी तथा फलफुलमा विषादी परीक्षण स्थगन गरिएको छ । यसै गरी मनसुनी वर्षा पछि आएको बाढी पहिरोका कारण बजारमा तरकारी तथा फलफुल अभाव छ । अभावको बीचमा व्यापारीहरुले अस्वभाविक वृद्धि गरेपछिे विभागले जनाएको छ । तसर्थ, स्वदेश भित्रिने उत्पादनमा पनि विषादी परीक्षण हुनुपर्ने र स्वदेशमै उत्पादनको वातावरण बनाउनुपर्नेमा उपभोक्ताहरु जोड गर्छन् । सबै जसो नै गाउँघरमा खेती किसानी छोडेर काठमाडौं केन्द्रीत भएका कारण तरकारी तथा फलफुल उत्पादन कम तर माग अत्याधिक छ ।

पछिल्लो समय आएको बाढी र पहिरोका कारण तरकारी फलफूल बजारमा कम आयात भएको छ । कम आयातसंगै तरकारीको मूल्य महंगो भएको हो । तर, यही वाहानामा उपभोक्ताको ढाड सेक्ने व्यवसायीले बिल बिजकबिना नै बजारमा तरकारी तथा फलफुलको बिक्री गर्नु गलत छ । मुख्यतया उपभोक्तालाई स्वस्थ सस्तो तरकारी फलफूल विक्री गर्नु व्यवसायीको व्यवसायीक धर्म हो भने राज्यले पनि बजारमा हुने बदमासीको नियमन र अनुगमनलाई कडाई गर्दै राज्य भएको अनुभुति दिलाउन सक्नुपर्छ ।