काठमाडौं,१८ कात्तिक । सरकारले तिहार पछि नागरिकलाई राष्ट्रिय परिचयपत्र वितरण गर्ने भएको छ । तयारी थालेको आठ वर्षपछि सरकारले राष्ट्रिय परिचयपत्र वितरण गर्न लागेको हो ।

तिहारलगत्तै पाँचथरका नागरिक र सिंहदरबारमा कार्यरत उच्च पदस्थ कर्मचारीलाई बायोमेट्रिक विवरणसहितको चिप प्रविधियुक्त परिचयपत्र वितरण गर्न लागिएको राष्ट्रिय परिचयपत्र व्यवस्थापन केन्द्रका कार्यकारी निर्देशक दिपक काफ्लेले जानकारी दिनुभयो ।

गएको विहिबारदेखि परिचयपत्र छाप्न सुरु भएको छ । उहाका अनुसार पाचथरबाट परिचयपत्र वितरण सुरु गरिने त्यसपछि मुलुकभर वितरणकार्य आरम्भ गरिनेछ । परिचयपत्रमा दश औँलाको औँठाछाप हुने र कार्ड मेसिन रिडएबल प्रविधिको हुने काफ्लेले बताउनुभयो ।

कार्डमा स्थायी ठेगाना, जन्ममिति, आमाबाबु, हजुरबुबा, श्रीमान् श्रीमतीको नामसहित व्यक्तिगत सबै विवरण हुनेछ । यसैबीच, राष्ट्रिय परिचयपत्र वितरण भइसकेपछि अपराध नियन्त्रणमा समेत सहयोग पुग्ने उच्च प्रहरी अधिकारीहरुले बताएका छन् ।

अहिले कतिपयले पहिचान ढाट्ने र फर्जि कागजात बनाएर नागरिता लगायत प्रमाणपत्र बनाउने गरेकाले अब त्यस्तो प्रवृत्ति हट्ने अपेक्षा गरिएको छ ।