काठमाडौँ, १३ फागुन । विमान परिचारिका (एयर होस्टेस)लाई उडान गरिरहेकै अवस्थामा दुर्व्यवहार गरेको भन्दै दुई पाइलटसहित चालक दलका सबै निलम्बनमा परेका छन् ।

नेपाल वायुसेवा निगम (नेपाल एयरलाइन्स)को उडान नम्बर आरए ४१६ बाट गत १२ साउनमा काठमाडौँ फर्कँदै गर्दा आकाशमै एयर होस्टेसलाई दुर्व्यवहार गरेको भन्दै नियामक निकाय नेपाल नागरिक उड्डयन प्राधिकरणले उक्त उडानका चालक दलका सदस्यहरूलाई निलम्बन गरेको जनाएको छ ।

उनीहरूको छानबिन थालिएको प्राधिकरणका प्रवक्ता जगन्नाथ निरौलाले जानकारी दिए । प्राधिकरणले दुर्व्यवहार गर्ने पाइलटको नाम भने गोप्य राखेको छ ।

क्याप्टेन र कोपाइलटले उडान अवधिमा एयर होस्टेसलाई ककपिटमा बोलाएर दुर्व्यवहार गरेको उजुरी आएपछि छानबिन थालिएको प्रवक्ता निरौलाले बताए । प्राधिकरणले ‘ह्यारेसमेन्ट एक वर्क प्लेस’अन्तर्गत कारबाही अगाडि बढाएको उनले बताए ।

हाल निगमले दुई वटा न्यारोबडी र दुई वटा वाइडबडी गरी कुल चार वटा जहाजमार्फत दिल्ली, बैंगलोर, मुम्बइ, कतार, मलेसिया, साउदी अरेबिया, थाइल्यान्ड, हङकङ, जापानलगायत अन्तर्राष्ट्रिय गन्तव्यमा नियमित उडान गर्दै आएको छ ।