काठमाडौं, २९ माघ । प्रहरी कार्यालय मोरङले पाँच जना अपहरणकारीलाई पक्राउ गरेको छ । खुल्ला सीमा नाकाको फाइदा उठाउँदै भारतबाट बन्धक बनाएर मोरङ ल्याएका चार जना भारतीय नागरिकलाई प्रहरीले अपहरणकर्ता बाट छुटाउन सफल भएको हो।

प्रहरीले अपहरण कार्यमा संलग्न भएको आरोपमा सुनसरी, मोरङ निवासी ५ जनालाई सार्वजनिक गरेको छ ।

अपहरणकार्यमा सुन्दरहरैंचा नगरपालिकाका टीकाराम चौधरी, ठाकुर गुरुङ, नवराज गौतम रहेकाछन भने, सुनसरी इनरुवाका नारायण साह, मधुकर साहको संलग्नता रहेको जिल्ला प्रहरी कार्यालय मोरङका प्रमुख अरुणकुमार बीसीले बताए ।

गत बुधबार माघ २४ गते भारतको विहारस्थित खगडियाबाट ६ जनालाई भारतीय अपराधीले अपहरण गरेका थिए। अपहरणकारीले भारतबाट विराटनगर जोगबनी नाका हुुँदै अपहरित सबैलाई मोरङको सुन्दरहरैंचा नगरपालिका लुकाइछिपाइ राखेका थिए।

भारतको फारविसगञ्ज निवासी बालेश्वर साहले नेपालमा रहेको आफ्नो घरमा पुजाको बाहना बनाउदै खगडियाको बेन्दोर जिल्लाका राजकिशोर साह, अजयकुमार साह, अखिलेश साह, दिनबन्धु तिवारी, र रञ्जित कुमारलाई राती ८ बजे जोगबनी नाका हुँदै नेपाल भित्राएको प्रहरीको भनाइ छ।

तर पछि बन्धक बनाई १ लाख रुपैँया फिरौती मागीएको थियो । अपहरणका क्रममा शारीरीक र मानसिक यातना दिईएको पिडीतहरुले बताए । अपहरणमा परेका राजकिशोर होटलबाट भाग्न सफल भए पछि भारतीय र नेपाल प्रहरीलाई सम्पर्क गरेका थिए । उनैको सहकार्यमा प्रहरीले अपहरणकारीलाई पक्राउ गर्न सफल भएको हो ।

प्रहरीले पक्राउ परेकाहरुबाट ५० हजार भारतीय रुपैया, ५ थान मोबाइल सेट र एउटा मोटरसाइकल पनि बरामद गरेको छ।