काठमाडौँ, २२ फागुन । संघीय समाजवादी फोरमले सरकारमा सहभागी हुने निर्णय गरेको छ ।
पार्टीको आज बसेको वैठकले संविधान संशोधनको विषयलाई सरकारले अपनत्व ग्रहण गरेको निष्कर्ष निकाल्दै सरकारमा जाने प्रस्तावलाई अनुमोदन गरेको पार्टीका सहअध्यक्ष राजेन्द्र श्रेष्ठले जानकारी दिनुभयो ।
संविधान संशोधनमा सरकार सकारात्मक भएको आधारमा फोरमले लामो समयदेखि संविधान संशोधनका लागि गरेको सडक संघर्षको परिणाम स्वरुप अहिले वैचारिक रुपमा राजनीतिक सफलता प्राप्त भएको ठहर फोरमले गरेको छ ।
उहाँका अनुसार सरकारको नीति तथा कार्यक्रम र मन्त्रालयको बाडफाडका विषयमा भने नेकपा
(एमाले) र नेकपा (माओवादी केन्द) सँग छलफल हुने छ ।
परराष्ट्र फोरमले मागेकै छैन
यसअघि फोरमले आफु सरकारमा सहभागी बन्दा परराष्ट्रसहित तीन मन्त्रालय मागेको समाचार बाहिर आएका थिए ।
बामगठबन्धनसँगको वार्तामा आफुहरुले परराष्ट्र मन्त्रालय मागेको नभई बरु उनीहरुले लिन आग्रह गरेको फोरमको भनाई छ । तर, फोरमले परराष्ट्र मन्त्रालय आफ्नो लागि रोजाईको नभएको बताए ।
फोरमका उपाध्यक्ष राजेन्द्र श्रेष्ठले सत्तारुढ दलले आफुहरुलाई परराष्ट्र मन्त्रालय लिन आग्रह गरेको बताए ।
उनले सत्तारुढको परराष्ट्र मन्त्रालयको प्रस्ताव अस्वीकार गरिसकेको भन्दै उक्त मन्त्रालयबाहेकका तीन मन्त्रालय पाउनुपर्ने अडान राखेको जनाए ।
‘हामीले परराष्ट्र बाहेकका तीन मन्त्रालय मागेका हौँ, तर फोरमले परराष्ट्र माग्यो भनेर समाचार आइरन्छन्, तर बास्तविकता त्यस्तो होइन’ नेता श्रेष्ठले भने ।
फोरम उपाध्यक्ष श्रेष्ठका अनुसार अहिलेसम्मको सहमतिमा सत्तारुढ दल फोरमलाई तीन मन्त्रालय दिन तयार भएका छन् ।
कुनकुन मन्त्रालय भन्नेबारे भने छलफल हुनै बाँकी छ ।
तर, राजपा पनि सरकारमा जाने अवस्था आए फोरमले पाउने मन्त्रालय दुईवटा मात्रै हुनेछन् ।
पछिल्लो पटक प्रधानमन्त्री ओलीले राजपालाई समेत सरकारमा ल्याउने पहल थालेका छन् । त्यसका लागि ओलीले राजपा नेताहरुसँग पनि छलफल गरिसकेका छन् ।
पार्टीको प्रतिनिधिसभामा १७ जना सांसद रहेका छन् । एमालेका अध्यक्ष केपी शर्मा ओलीको नेतृत्वमा बाम गठबन्धनको सरकार यही फागुन ३ गते गठन भएको थियो ।
प्रतिक्रिया दिनुहोस्