काठमाडौं, २१ वैशाख । काठमाडौंमा शुक्रबार यातायात समितिहरुले सार्वजनिक यातायात ठप्प पारेपछि गन्तव्यमा पुग्न कठिनाइ बेहोर्नेहरुका लागि फेसबुक ग्रुपमार्फत ‘कारपूल काठमाडौं‘ अफर गर्नेहरु थुप्रै देखिएका छन् ।

सवारी नचलेपछि हिँडेरै गन्तव्यमा पुग्नुपर्ने बाध्यता भएकाहरुले यो ग्रुप प्रयोग गरिरहेका छन् ।

‘कारपूल काठमाडौं’ भारतीय नाकाबन्दीको बेला काठमाडौंमा सार्वजनिक सवारी बन्द भएर सास्ती खेपेका सर्वसाधारणलाई निजी सवारी साधन धनीले लिफ्ट दिएर सहयोग गर्न फेसबुकमार्फत चलाईएको अभियान हो ।

अहिले ‘कारपूल काठमाडौं’मा झण्ढै १ लाखभन्दा बढी व्यक्ति जोडिएका छन् । विहानैदेखि यो ग्रुपमा निजी सवारी धनीले यात्रुलाई लिफ्ट लिनका लागि अफर गरिरहेका छन् । हड्तालविरुद्ध लड्न लिफ्ट दिन अपील गर्दै पोष्टहरु भएका छन् ।

एक्लै आफ्ना सवारी साधनमा निस्कँदै गर्दा फेसबुकको यो कारपुल ग्रुपमा लिफ्ट अफर गरेर पोष्ट गर्न सकिन्छ । यसमा आफूलाई सो रुटमा जानुपर्ने भएर सामाजिक सञ्जालमै आवश्यक पर्ने यात्रुले लिफ्ट माग्न सक्छन् ।

शुक्रबार सार्वजनिक सवारी बन्द भए पनि निजी मोटरसाइकल र कारहरु सडकमा चलेका छन् । त्यसैले आफू जाने गन्तब्यसम्म लिफ्ट अफर गर्न यो प्लेटफर्म यात्रुहरुलाई उपयोगी साबित भएको छ ।