म्याग्दी, २१ वैशाख । सरकारले यातयात व्यवसायीहरुको लागी ल्याएको नयाँ निर्देशिकाको विरुद्धमा सवारी साधन घर ग्यारेजमा थन्काएर आन्दोलनमा उत्रिएका म्याग्दीका यातायात व्यवसायि समितिका नेताहरु पक्राउ पर्न थालेका छन् । आफ्नो व्यवसायिक संस्था मातहतका सवारी साधन घर ग्यारेजमा थन्काएर आन्दोलनमा उत्रिएका समितिका नेताहरुलाई पक्राउ गर्न गृहमन्त्रालयको निर्देशन बमोजिम म्याग्दीमा चार जनालाई पक्राउ गरिएको जिल्ला प्रहरी कार्यालयले जनाएको छ ।

पक्राउ पर्नेमा म्याग्दी जिप तथा बस सञ्चालक समितिका कार्यबहाक अध्यक्ष लाल बहादुर थापा क्षेत्री, सचिब सुमन श्रेष्ठ, म्याग्दकाली यातायात व्यवसायी समितिका सचिब देवेन्द्र पौडेल र काउण्टर इन्चार्ज राम्जी थापा रहेको जिल्ला प्रहरी कार्यालयका प्रहरी नायब उपरिक्षक बसुन्धरा खड्काले जानकारी दिनुभयो । सिण्डीकेट प्रणाली खारेजीको विरुद्धमा आन्दोलनमा उत्रिएका व्यवसायि समितिमा आबद्ध भएकाहरुलाई पक्राउ गर्ने गृहमन्त्रालयको निर्देशन अनुसार उनीहरुलाई प्रक्राउ गरिएको प्रनाउ खड्काले बताउनुभयो ।

गृह मन्त्री रामबहादुर थापा (बादल)को निर्देशन अनुसार गृह मन्त्रालयले यातायात सेवा अवरुद्ध पार्ने सिण्डीकेट पक्षधर समितिका पदाधीकारीलाई पक्राउ गर्न देशभरका प्रशासन कार्यालयमा पत्राचार गरेपछि प्रहरीले धमाधम पक्राउ गर्न थालेको हो । यसैबिच सरकारले ल्याएको नयाँ निर्देशिका विरुद्ध म्याग्दीका यातायात व्यवसायीले शुक्रबार सेवा ठप्प पारेपछि सर्वसाधारण यात्रु मर्कामा परेका छन् ।

म्याग्दी जिप तथा बस ब्यवसायी, धौलागिरि, पृथ्वी, म्याग्दीकाली, म्याग्दी ट्याक्सी व्यवसायी लगायत यातायात ब्यवसायी समिति सम्बद्ध व्यवसायीले बिहानैदेखि सार्वजनिक सवारी साधन सञ्चालन नगरेपछि यात्रु मर्कामा परेका हुन् ।

समितिले आन्दोलन गरेपनि म्याग्दीमा कम्पनी रजिस्टारको कार्यालयमा दर्ता भएका दुई वटा कम्पनी सम्बद्ध व्यवसायीले सेवा दिएका छन् । पश्चिम म्याग्दी यातायात प्रा।लीले दरवाङ देखि ताकम मुना, बिम, लामेला तमान, देविस्थान, बेनी क्षेत्रमा सेवा सूचारु गरेको छ । यसैगरी बागलुङ भगवती यातायात प्रा।लीले बेनी काठमाठौ रुटमा सेवा दिएको हो ।