गोरखा, १८ जेठ । सिल गरेको मिनिरल वाटरभित्र अखाद्य वस्तु पाइएपछि तनहुँमा उत्पादित दुई उद्योगको पानी गोरखामा बेच्न रोक लगाइएको छ ।

जिल्ला प्रशासन कार्यालय गोरखाले तनहुँ आँबुखैरेनी –६, स्थित कृति वेभरेज इण्डष्ट्रिजले उत्पादन गर्ने सञ्जिवनी र आँबुखैरेनी –४, स्थित सुरज मिनरल वाटर नामको कम्पनीले उत्पादन गर्ने छिम्केश्वरी ब्राण्डको पानी गोरखामा बिक्रीका लागि रोक लगाएको हो ।

गएको चैत ८ गते गोरखाको १२ किलो वजारमा सञ्जिवनी नामको पानीको बोतलभित्र चराको सिंगो प्वाँख तैरिरहेको भेटिएको थियो ।

त्यही दिन छिम्केश्वरी ब्राण्डकोे त्यस्तै पानीको बोतलमा पनि अखाद्य सेता कणहरु भेटिएका थिए । प्रशासनले दुवै कम्पनीको बोतलको पानीको गुणस्तर परीक्षणका लागि पठाएको थियो ।

क्षेत्रीय खाद्य प्रविधि तथा गुण नियन्त्रण कार्यालय भैरहवाले प्रयोगशाला परीक्षणपछि पानी प्रयोगका लागि अयोग्य भएको प्रमाणित गरेकाले गोरखा जिल्लाभर बिक्रीमा रोक लगाउन गोरखा उद्योग बाणिज्य संघलाई भनिएको प्रमुख जिल्ला अधिकारी नारायणप्रसाद भट्टराईले बताए ।

दुवै कम्पनीले आफूले उत्पादन गर्ने पानीको शुद्धताको सुनिश्चितता नगरेसम्म जिल्लाभित्र बिक्रीमा रोक लगाउने निर्णय भएको उहाँको भनाई छ ।

क्षेत्रीय खाद्य प्रविधि तथा गुण नियन्त्रण कार्यालय भैरहवाले पानीको नमुना परीक्षण गरी जिल्ला प्रशासन कार्यालय गोरखालाई प्रतिवेदन पठाएको हो । प्रतिवेदनमा प्रशोधित पिउने पानीमा बाह्य अखाद्य वस्तु भेटिनु नेपाल सरकारको अनिवार्य मापदण्ड विपरीत हुने भनिएको छ ।