सुर्खेत, ९ पुस । कर्णाली प्रदेश सरकारले कालीकोटका अग्निपीडित परिवारलाई राहत सामग्री प्रदान गरेको छ ।

मुख्यमन्त्री महेन्द्रबहादुर शाहीको नेतृत्वमा कालीकोटको पलाता गाउँपालिका–१ खाडाबस्ती पुगेको टोलीले आज अपराह्न राहत सामग्री वितरण गरेको हो । प्रदेश सरकारले प्रतिपरिवार रु २० हजार तथा खाद्यान्न र लत्ताकपडा वितरण गरेको छ ।

आइतबार राति भएको आगलागीमा सात जना घाइते हुनाका साथै ५० घरधुरी पूर्ण क्षतिग्रस्त भएको आन्तरिक मामिला तथा कानून मन्त्रालयका सचिव तोयनारायण सुवेदीले जानकारी दिनुभयो ।

नेपाली सेनाको हेलीकोप्टरमार्फत राहत सामग्री लिएर मुख्यमन्त्री शाहीसँगै राष्ट्रियसभा सदस्य जीवन बुढा, प्रतिनिधिसभा सदस्य दुर्गबहादुर रावत र प्रदेशसभा सदस्य कुर्मराज शाहीलगायत अग्निप्रभावित क्षेत्रमा पुग्नुभएको छ ।

सङ्घीय सरकारका तर्फबाट कालीकोट सदरमुकाम मान्मबाट तीन हजार केजी चामलसहित दाल, नुन, तेललगायत सामग्री अग्निपीडितलाई उपलब्ध गराइएको छ ।

त्यस्तै कालीकोटका तिलागुफा नगरपालिका, रास्कोट नगरपालिका र सान्नी त्रिवेणी गाउँपालिकाले दुई–दुई लाख रुपैयाँ सहयोग गर्ने निर्णय गरेका छन् ।