सप्तरी, ११ असार । बिहीबार बिहान वर्षासँगै परेको चट्याङ् लागेर सप्तरीमा चार जनाको मृत्यु भएको छ । प्रहरीका अनुसार जिल्लाको छुट्टाछुट्टै ठाउँमा चार जनाको मृत्यु भएको हो भने १ जना घाईते भएका छन् ।

सप्तरीको महदेवा गाउँपालिकामा २ जना, राजगढ गाउँपालिकामा १ जना र डाक्नेश्वरी नगरपालिकामा १ जनाको चट्याङ्ले मृत्यु भएको  जिल्ला प्रहरी कार्यालय सप्तरीका प्रवक्ता तिलक भारतीले जानकारी दिनुभयो ।

भारतीका अनुसार चट्याङ् लागेर ज्यान गुमाउनेहरुमा ६० वर्षीय छेदी ठाकुर, २७ वर्षीय बेचन यादव, ३० वर्षीया ललितादेबी यादव र ४६ वर्षीय केसी साह रहेको छन् ।

बिहानै सप्तकोशी नदीमा नुहाउन गएका बेला बेचन यादव र छेदी ठाकुरको चट्याङ् लागेर मृत्यु भएको हो भने ललितादेवी यादव खेतमा धान रोप्न जाँदा र केसी साह पनि खेतमा काम गर्न गएका बेला चट्याङ् लागेर मृत्यु भएको भारतीले उहाँले बताउनुभयो ।

यस्तै सोही ठाउँकी १८ वर्षीया आशा मण्डल घाइते भएको उहाँले बताउनुभयो ।

‘सबै ठाउँमा घटना त्यस्तै बिहान ८ बजे आसपास भएका हुन्,’ डीएसपी भारतीले भन्नुभयो, ‘दुई जनाको घटनास्थलमै र अन्य दुई जनाको उपचार गर्न लाँदै गर्दा मृत्यु भएको हो।’

आशा मण्डललाई भने घरमै काम गरिरहेका बेला चट्याङले लागेको प्रहरीले जनाएको छ। उपचारका लागि उनलाई गजेन्द्रनारायण सिंह अस्पताल राजविराज लगिएको छ।