काठमाडौँ, ६ बैशाख । कोरोना संक्रमित हुने दर झन्डै १९ प्रतिशत पुगेको छ । स्वास्थ्य मन्त्रालयका अनुसार पछिल्लो २४ घण्टामा ५ हजार ७ सय ८३ जनाको स्वाब परीक्षण गर्दा १ हजार ९६ अर्थात् १८.९५ प्रतिशतमा कोरोना पुष्टि भएको हो । ४ जनाको कोरोनाकै कारण मृत्यु भएको छ । हालसम्म मृत्यु हुनेको संख्या ३ हजार ८३ पुगेको छ । केही दिनयता संक्रमण दर बढ्दै गएको छ । बुधबार संक्रमण दर १२.७२ प्रतिशत, बिहीबार १२.८६ प्रतिशत र शुक्रबार १४।६१ प्रतिशत थियो । शनिबार १४ प्रतिशत रहेकामा आइतबार १८.९५ पुगेको हो । संक्रमित हुनेमा नेपालगन्ज र काठमाडौंमा बढी छन् ।

आइतबार काठमाडौंमा ३ सय २६ र बाँकेमा १ सय ६३ जनामा कोरोना देखिएको छ । संक्रमित हुनेमा २०–४० वर्ष उमेर समूहका धेरै छन् । विद्यालय तहका बालबालिका संक्रमण हुने क्रमसमेत बढ्दै गएको छ । १९ वर्षमुनिका संक्रमित करिब १० प्रतिशत छन् । बुधबार ७०बालबालिकामा संक्रमण पुष्टि भएको थियो । यो संख्या बिहीबार ५२, शुक्रबार ८१ र शनिबार ८९ थियो । आइतबार बढेर १ सय १२ पुगेको मन्त्रालयले जनाएको छ । ५ वर्षमुनिका ३ हजार ५ सय ६५ जनालाई कोरोना देखिइसकेको छ । जसमध्ये १० जनाले ज्यान गुमाइसकेका छन् ।