धनगढी । सुदूरपश्चिम भ्रमणमा रहेका पूर्वाधार विकासमन्त्री सुनिल लम्साल बिरामी परेपछि भ्रमण छोट्याएर काठमाडौं फर्किएका छन् ।

मन्त्री लम्साललाई भाइरल ज्वरो र रुघाको संक्रमण देखिएको बताइएको छ । शनिबार साँझ आफैँ गाडी चलाएर दार्चुलाबाट बैतडीको गोठालापानी पुगेका लम्सालको स्वास्थ्यमा समस्या देखिएपछि नेपाली सेनाको हेलिकप्टरमार्फत धनगढी ल्याइएको हो ।

बैतडीका प्रमुख जिल्ला अधिकारी मीना अर्यालका अनुसार स्वास्थ्यमा समस्या देखिएपछि सुर्खेतबाट नेपाली सेनाको हेलिकप्टर मगाएर मन्त्री लम्साललाई धनगढी ल्याइएको हो । धनगढीबाट उनी हवाईजहाजमार्फत काठमाडौं फर्किने छन् ।

मन्त्री लम्सालको बैतडी र बझाङका विभिन्न स्थानमा राजमार्ग तथा पूर्वाधारको अवस्थाबारे निरीक्षण गर्ने कार्यक्रम थियो । तर स्वास्थ्यमा समस्या देखिएपछि हिँडडुल गर्नसमेत कठिन भएकाले निर्धारित कार्यक्रम प्रभावित भएका छन् ।

मन्त्री लम्सालको टोली शुक्रबारदेखि सुदूरपश्चिमका विभिन्न जिल्लाको भ्रमणमा रहेको थियो । स्वास्थ्यमा समस्या आएपछि भ्रमण छोट्याएर टोली काठमाडौं फर्किएको हो ।

Originally published on abcnews.com.np.