काठमाडौँ, ५ चैत । पत्नी सीता दाहालको उपचारका लागि अमेरिका गएका नेपाल कम्युनिस्ट पार्टी (नेकपा) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ का विरुद्ध चलेका हल्ला वाहियात अफबाह भएको अमेरिकी दूतावासले जनाएको छ ।

तत्कालीन नेकपा (माओवादी) को कथित पीडितको बहाना गरेर अमेरिकामा बसेर नेपालको खेदो खन्ने गिरोहले नेपाल सरकार र नेताहरुको बदनाम अभियानमा लाग्दै आएको नेकपाले जनाएको छ ।
नेपालमा सधैं द्धन्द्धको खेती गर्ने तत्वहरुको कुप्रचार बढी भएपछि नेपालस्थित अमेरिकी दुतावासले प्रचण्डका लागि ‘नो इन्भेष्टिगेशन’ सर्कुलर जारी गरेको छ ।

अमेरिकी दुतावास स्रोतका अनुसार, प्रचण्डका लागि अमेरिकाले विशेष रुपमा जारी गर्ने ‘नो इन्भेष्टिगेशन’ भन्ने आन्तरिक सर्कुलर जारी गरेको छ ।

सन् २०१४ मा नरेन्द्र मोदी प्रधानमन्त्रीमा निर्वाचित भएपछि अमेरिकाले उनीमाथि लागेको भिसा प्रतिवन्ध हटाउंदै नो अव्जेक्सन सर्कुलर जारी गरेको थियो । मोदीलाई उनी मुख्यमन्त्री भएका बेला गुजरातको भुजमा भएको दुई हजार जनाभन्दा बढी मुस्लिम मारिएको घटनामा अमेरिकाले यस्तो प्रतिवन्ध लगाएको थियो ।

अमेरिका भ्रमणका क्रममा उत्पन्न हुन सक्ने कानूनी झमेला हटाउन विरलै मात्र यस्तो सर्कुलर जारी गरिन्छ । यस्तो सर्कुलरपछि अमेरिकी सरकारका कुनैपनि निकायले कसैमाथि निगरानी गर्न पनि नमिल्ने अमेरिकी दूतावास स्रोतले जानकारी दिएको छ ।

स्रोतका अनुसार देशको पूर्व प्रधानमन्त्रीका बारेमा अनावश्यक दुष्प्रचार गर्नेहरुमाथि सरकारी सुरक्षा निकायले निगरानी गरिरहेको बताउंदै आवश्यक कारबाही गर्ने उच्च सुरक्षा अधिकारीले बताएका छन् ।

प्रचण्डको भ्रमण अगाडि अमेरिकी राजदुत रेन्डी बेरीले प्रचण्ड निवासमै पुगेर भेट गरी अमेरिका भ्रमणका क्रममा कुनैपनि झमेला नहुनेमा विश्वस्त पार्दै भ्रमणका क्रममा अमेरिकाले विशिष्ट सम्मानका साथ स्वागत गर्ने बताएका थिए । लगत्तै दूतावासको सुरक्षा निकायले यस्तो खालको सर्कुलर जारी गरेको थियो ।

यस अघि सन् २००८ मा प्रधानमन्त्री रहेका बेला अध्यक्ष प्रचण्डले अमेरिकाको भ्रमण गर्दै तत्कालीन राष्ट्रपति जर्ज बुशस“ग समेत भेट वार्ता गरेका थिए । प्रचण्ड पत्नी सीता दाहालको उपचारसगै अमेरिकी उच्च अधिकारीहरुसंग समेत दुई पक्षीय वार्ता गर्ने कार्यक्रम रहेको छ । प्रचण्डका विरुद्ध चलाइएका अफबाह वा उजुरीजस्ता हल्लाको कुनै अर्थ नभएका अमेरिकाका लागि नेपाली राजदूत डा. अर्जुंन कार्कीले बताए ।