बुटवल, ७ चैत्र । विश्वव्यापी महामारीको रुप लिएको कोरोना संक्रमण [कोभिड-१९] रोकथाम तथा आवश्यक पूर्व तयारीलाई प्रदेश ५ मा तिबै पारिएको छ ।
शुक्रबार प्रदेश ५ का मुख्यमन्त्री शंकर पोखरेलको अध्यक्षतामा बसेको बैठकले प्रदेशका ३ ठाउँमा कोरोना संक्रमणको आशंका गरिएकालाई उपचार गर्न अस्पतालको व्यवस्था गर्ने निर्णय गरेको छ । बैठकले रुपन्देहीको भिम अस्पताल, देवदह क्याम्पस तथा बुटवल धागो कारखानामा आइशोलेसन अस्पतालका रुपमा प्रयोग गर्ने निर्णय गरेको छ भने दाङको बेलझुण्डीमा रहेको राप्ती प्रादेशिक अस्पताल र राप्ती स्वास्थ्य विज्ञान प्रतिस्ठानमा आइशोलेसनको व्यवस्था गर्ने निर्णय गरेको छ । बैठकले प्रदेशको बाँकेजिल्लामा रहेको आयूर्वेद रोग अस्पताल तथा नेपाल प्रहरीको अस्पतालमा आइशोलेसन व्यवस्था गर्ने सरकारले निर्णय गरेको छ ।
बैठकमा सुरक्षा निकायका प्रतिनिधि, बुटवल उपमहानगरपालिकाका प्रमुख सहित सरोकारावालाहरुको सहभागिता रहेको थियो ।
बैठकले सामाजिक विकास मन्त्री सुदर्शन बरालको नेतृत्वमा ५ सदस्यीय र्यापिड रेस्पोन्स टिम गठन गरेको छ । सदस्यहरुमा सामाजिक विकास मन्त्रालयका सचिव, सम्बन्धित महाशाखा प्रमुख, लुम्विनी प्रादेशिक अस्पताल तथा भिम अस्पतालका मेडिकल सुपरीटेण्डन रहने गरि निर्णय गरेको हो । त्यसैगरी बैठकले भारतदेखि नेपाल प्रवेश गर्ने सवारी साधनलाई मेडिकल ट्रिटमेण्ट गरेर मात्रै प्रवेश गर्न दिने, भारतीय तथा अन्य मूलुकका नागरिकहरुलाई अत्यावश्यक बाहेक नेपाल प्रवेशमा रोक लगाउने, सिमानामा आवतजावत गर्ने मानिसहरुको तथ्याङ्क संकलन गर्ने तथा व्यवस्थापनका लागि आवश्यक जनशक्ति खटाउने निर्णय गरेको छ ।
यसैगरी एम्बुलेन्सहरूको जिल्लागत रुपमा तथ्याङ्क संकलन गरि सम्बन्धित जिल्ला प्रमुखलाई बुझाउने तथा चालकको कमी भएको अवस्थामा सुरक्षा निकायबाट व्यवस्था गर्नुका साथै कोरोना भाइरसको सूचना सम्प्रेषण तथा सुरक्षाका लाग छुट्टै संयन्त्र निर्माण गर्ने निर्णय गरिएको छ ।