काठमाडौं।  सहकारी ठगी प्रकरणमा राष्ट्रिय स्वतन्त्र पार्टी (रास्वपा) सभापति रवि लामिछाने दोषी देखिएका छन् ।

गोर्खा मिडिया नेटवर्कमा ठूला तीन सहकारीको रकम ल्याएको विषयमा सहकारी संस्था बचत रकम संसदीय छानबिन विशेष समितिले लामिछानेलाई दोषी देखाएको हो ।

गोर्खा मिडिया कम्पनीका अध्यक्ष गितेन्द्रबाबु (जीबी) राई, प्रबन्ध निर्देशक लामिछाने र सञ्चालक छविलाल जोशीले केवाईसी फर्म भरेर चेकमा हस्ताक्षर गर्ने गरी दुईवटा बैंकमा संयुक्त खाता सञ्चालन गरिरहेको भेटिएको समितिका एक सदस्यले बताएका छन् ।

समितिले गोर्खा मिडिया नेट्वर्कले खोलेको ग्यालेक्सी टेलिभिजन सञ्चालनका लागि देशका तीन ठूला सहकारीबाट ८१ करोड रुपैयाँ बढी भित्र्याएको पनि भेट्टाएको छ ।

लामिछाने प्रबन्ध निर्देशक रहेकै समयसम्म पोखराको सूर्यदर्शन, बुटवलको सुप्रिम, काठमाडौंको स्वर्णलक्ष्मी र चितवनको सहारा सहकारीबाट ८१ करोड ३१ लाख रुपैयाँ गैरकानुनी रूपमा गोर्खा मिडिया नेटवर्कमा भित्रिएको समितिले ठहर गरेको छ ।

समितिले यस प्रकरणमा रविसँगै ९ जनालाई कारबाही गर्नुपर्ने आधारसहितको प्रतिवेदनमा आज संसद्मा पेश गर्दै छ । गोर्खा मिडियाका तत्कालीन अध्यक्ष जीबी राई हाल मलेसियामा लुकेको बताइएको छ ।

उता रवि, तथा गोर्खा मिडियाकै विपिन आचार्यले समितिमै उपस्थित भएर बयान दिएका थिए । रविसँग मात्रै समितिले ५१ वटा प्रश्न सोध्दै ९ घण्टा लामो बयान लिएको थियो । तर रविले आफू सहकारी प्रकरणमा नमुछिएको बताएका छन् । पोखरा गएका बेला सहकारीपीडितले कालोझन्डा देखाउँदा पनि उनले नखाएको विष नलाग्ने जिकिर गरेका थिए ।

समितिका सभापति सूर्यबहादुर थापा क्षत्रीले तीन महिना १५ लिन लामो अनुसन्धानपछि तयार पारिएको प्रतिवेदन सभामुख देवराज घिमिरेलाई प्रतिवेदन सोमबार बुझाउन लागेका हुन् ।

एमाले सांसद थापाको नेतृत्वमा जेठ १५ गते गठन भएको संसदीय छानबिन समितिले जेठ २२ गतेदेखि आफ्नो काम थालेको थियो । शुरुमा तीन महिनाको समय पाएको समितिको भदौ २२ गतेसम्म प्रतिवेदन तयार नभएपछि १५ दिन समय थपिएको थियो ।

समितिले सहकारीसम्बद्ध सरोकारवाला, सरकारी निकाय, ठगी भएका भनिएका सहकारीका वर्तमान र पूर्व पदाधिकारी, सहकारी ठगीको आरोप लागेका विभिन्न व्यक्तिहरूसँग गरी ६३ वटा बैठक गरेको थियो । समितिले शनिबार मात्रै प्रधानमन्त्री केपी शर्मा ओलीसँग छलफल गरेको थियो ।

यसैबीच समिति सदस्य एवम् रास्वपा सांसद शिशिर खनालले भने प्रतिवेदन सबै सदस्यहरूले हेर्न बाँकी रहेको बताएका छन् । उनले सामाजिक सञ्जालमार्फत् प्रतिवेदन सबै सदस्यले हेरेर हस्ताक्षर गर्न बाँकी नै रहेको उल्लेख गरेका हुन् ।

समितिमा एमाले सांसद सूर्य थापा संयोजक छन् । सदस्यहरूमा एमालेबाट सरिता भुसाल, नेपाली कांग्रेसबाट बद्री पाण्डे (दिलेन्द्र प्रसाद बडू) र ईश्वरीदेवी न्यौपाने, माओवादी केन्द्रबाट लेखनाथ दाहाल, राष्ट्रिय स्वतन्त्र पार्टीबाट शिशिर खनाल र राष्ट्रिय प्रजातन्त्र पार्टीका ध्रुवबहादुर प्रधान छन् ।

कांग्रेस सहमहामन्त्रीसमेत रहेका बद्री पाण्डे पर्यटन मन्त्री बनेपछि बडूले समितिको सदस्यका रूपमा काम गरिरहेका छन् ।