काठमाडौं ८ कात्तिक । बंगलादेश सरकारले पूर्वप्रधानमन्त्री शेख हसिनाको पार्टी अवामी लिगनिकट विद्यार्थी सगठन ‘बंगलादेश छात्र लिग’माथि प्रतिबन्ध लगाएको छ । गत जुलाई–अगस्टमा भएको विद्रोहको नेतृत्व गर्ने विद्यार्थी समूहको मागपछि ‘बंगलादेश छात्र लिग’ माथि प्रतिबन्ध लगाइएको हो ।

विद्यार्थी संगठनमाथि आतंकवादविरोधी ऐन, २००९ अनुसार प्रतिबन्ध लगाइएको बंगलादेशको गृह मन्त्रालयले जनाएको छ ।

‘बंगलादेशको स्वतन्त्रतापछि विभिन्न समयमा, विशेषगरी पछिल्लो १५ वर्षको तानाशाही शासनकालमा, बंगलादेश अवामी लिगको भ्रातृ संगठन बंगलादेश छात्र लिग’ हत्या, यातना, साझा कोठामा उत्पीडन, छात्रावास, बलात्कार र यौन उत्पीडनलगायतका विभिन्न सार्वजनिक सुरक्षासम्बन्धी गतिविधिहरूमा संलग्न छ,’ मन्त्रालयले जारी गरेको आदेशमा भनिएको छ ।

यसअघि मंगलबार पूर्वप्रधानमन्त्री हसिनालाई सत्ताच्युत गर्नेगरी भएको आन्दोलनको नेतृत्व गर्ने ‘एन्टी–डिस्क्रिमिनेशन स्टुडेन्ट मुभमेन्ट’ले बंगलादेशका राष्ट्रपति मोहम्मद शाहबुद्दीनको राजीनामासहित पाँच बुँदे माग अघि सारेको थियो । ती मागमा बंगलादेश छात्र लिगमाथि प्रतिबन्ध लगाउने माग पनि समावेश थियो ।

त्यस्तै, उनीहरूले बंगलादेशमा सन् २०२४ को चुनाव नजिकिँदै गर्दा वर्तमान राजनीतिक वातावरणलाई प्रतिबिम्बित गर्ने संविधानको आवश्यकता परेको जनाएका छन् । ‘एन्टी–डिस्क्रिमिनेशन स्टुडेन्ट मुभमेन्ट’ले एक साताभित्र माग पूरा नभए पूर्ण शक्तिका साथ पुनः आन्दालेन गर्ने चेतावनीसमेत दिएको छ ।