रुकुमपश्चिम । रुकुमपश्चिममा थुनुवा कैदी बोकेको गाडी दुर्घटना हुँदा एक जनाको मृत्यु भएको छ । एक जना गम्भीर घाइते हुनुभएको छ ।

बिहीबार बेलुका पौने ६ बजे रुकुमपश्चिमको मुसीकोट नगरपालिका —८ ताउनेस्थित मध्यपहाडी राजमार्गमा जिल्ला कारागार कार्यालय रुकुमपश्चिमको बा.प्र. ०३००१ च ३९५६ नम्वरको भ्यान दुर्घटना भएको हो ।

जिल्ला प्रहरी कार्यालयका प्रहरी नायब उपरीक्षक (डिएसपी) बेदबहादुर पौडेलका अनुसार रुकुमपूर्वबाट फर्कदै गरेको भ्यान विपरित दिशाबाट आइरहेको क.प्र.०३००१ प ०७६८ नम्बरको पल्सर बाइकसँग ठोकिएर दुर्घटना भएको हो ।

दुर्घटनामा परेर मोटरसाइकलमा रहेका एक जनाको मृत्यु भएको छ भने एक जना घाइते भएको प्रहरीले जनाएको छ । डिएसपी पौडेलले दिनुभएको जानकारी अनुसार मृत्यु हुनेमा आठबिसकोट नगरपालिका —७ का २१ वर्षीय निवास बोहरा रहेका छन् ।

त्यसैगरी आठबिसकोट नगरपालिका —१० का १८ वर्षीय गणेश शाही गम्भीर घाइते हुनुभएको छ । उहाँलाई उपचारको लागि जिल्ला अस्पताल सल्ले ल्याइएकोमा थप उपचारका लागि सुविधा सम्पन्न अस्पतालमा लैजान रिफर गरिएको छ ।

जिल्ला कारागार कार्यालय रुकुमपश्चिमबाट थुनुवा बन्दीलाई साक्षी बयानका लागि रुकुमपूर्वमा रहेको रुकुमकोट जिल्ला अदालतमा उपस्थित गराई रुकुमपश्चिमतर्फ फर्कने क्रममा उक्त दुर्घटना भएको प्रहरीले जनाएको छ ।

दुर्घटनापश्चात अस्थायी प्रहरी पोष्ट साँखबाट प्रहरी सहायक निरीक्षक देवेन्द्रकुमार थापाको नेतृत्वको टोली घटनास्थल पुगेको थियो । जिल्ला प्रहरी कार्यालयबाट प्रहरी निरीक्षक झविन्द्र परियारको नेतृत्वमा ट्राफिकसहितको टोली अनुसन्धानका लागि घटनास्थल पुगेको जिल्ला प्रहरी कार्यालयले जनाएको छ ।

Originally published on abcnews.com.np.