सुर्खेत । कर्णाली प्रदेशका मुख्यमन्त्री मंगलबहादुर शाहीले आगामी भदौ ३ गते प्रदेशसभाबाट विश्वासको मत लिने भएका छन्।

मुख्यमन्त्री शाहीले विश्वासको मत लिने प्रस्तावसम्बन्धी पत्र प्रदेशसभा सचिवालयमा दर्ता गराएका छन्। प्रदेशसभा नियमावली, २०८१ को नियम १५१ बमोजिम उनले विश्वासको मत लिन लागेका हुन्।

प्रदेशसभा सचिवालयका सूचना अधिकारी राजेन्द्र पौडेलका अनुसार मुख्यमन्त्री शाहीले भदौ ३ गते विश्वासको मत लिने गरी पत्र दर्ता गराएका छन्। अब सभामुखले प्रदेशसभा बैठकको समय र कार्यसूची निर्धारण गर्नेछन्।

नियमावलीअनुसार निर्धारित दिन मुख्यमन्त्रीले सभामुखको अनुमति लिएर वक्तव्यसहित विश्वासको मतसम्बन्धी प्रस्ताव पेस गर्नेछन्। त्यसपछि प्रस्तावमाथि छलफल र मतदान हुनेछ।

मुख्यमन्त्री शाहीले विश्वासको मत लिने तयारी गरिरहँदा सत्ता साझेदार दलहरूबीच मन्त्रालय भागबण्डाको विषय भने अझै टुंगिएको छैन। मन्त्रालयको संख्या र जिम्मेवारी बाँडफाँटमा सहमति जुट्न नसक्दा मन्त्रिपरिषद् विस्तारसमेत प्रभावित भएको छ।

४० सदस्यीय कर्णाली प्रदेशसभामा नेपाली कांग्रेस र नेपाली कम्युनिस्ट पार्टी (नेकपा)का १४–१४, नेकपा एमालेका १०, राष्ट्रिय प्रजातन्त्र पार्टीका एक र एक स्वतन्त्र सांसद छन्।

नेकपा र एमालेबीचको सत्ता समीकरणअनुसार सत्तापक्षमा २४ सांसद छन्। मुख्यमन्त्री शाहीलाई विश्वासको मतका लागि भने प्रदेशसभाको बहुमत अर्थात् २१ सांसदको समर्थन आवश्यक पर्नेछ।

Originally published on abcnews.com.np.