काठमाडौं, ३ असार । संघीय संसद्को संयुक्त बैठक आइतबार बस्दै छ ।

प्रतिनिधिसभा र राष्ट्रियसभाको संयुक्त बैठक अपराह्न चार बजे बस्न लागेको हो । यसअघि जेठ २८ गते संयुक्त बैठक आह्वान भए पनि प्रक्रियागत त्रुटि भएको भन्दै अन्तिम समयमा सूचना टाँसेर स्थगित गरिएको थियो ।
राष्ट्रपति विद्यादेवी भण्डारीले मन्त्रिपरिषद्को सिफारिस अनुसार संयुक्त बैठक आह्वान गर्नु भएको हो ।

संयुक्त बैठक सञ्चालनसम्बन्धी नियमावली नबनेको र कार्यविधि पनि स्पष्ट नभएको अवस्थामा जेठ २८ गते सूचनामार्फत बैठक बोलाइएको थियो । यसअघि अभ्यास गरिएको बैठकबाट सूचना दिने प्रक्रिया समेत नपुगेकाकाले विशेष कारण भन्दै बैठक स्थगित गरिएको थियो । तर कार्यविधि स्पष्ट नभएपछि सरकारले संविधानको धारा ९३ को व्यवस्था अनुसार संयुक्त अविधेवेशन आह्वानका लागि राष्ट्रपतिलाई सिफारिस गरेको थियो ।

सांसद् कृष्णभक्त पोखरेल सभापति रहेको समितिले तयार पारेको संयुक्त सभा तथा समिति सञ्चालन नियमावली आइतबार नै पारित गर्ने तयारी छ ।

नियमावली अनुसार संयुक्त सदनका सदस्य प्रतिनिधित्व रहने गरी दुई समिति गठन हुनेछन् । जसमा राज्यका नीति निर्देशक सिद्धान्त कार्यान्वयन तथा अनुगमन समिति रहनेछ । यस्तै, संसदीय सुनुवाइ समितिमा दुबै सदनका सदस्य रहनेछन् । सुनवाइ समितिमा १२ सदस्य प्रतिनिधिसभा र ३ सदस्य राष्ट्रियसभाबाट प्रतिनिधित्व हुनेछ ।

यस्तै, नियमावलीमा संयुक्त बैठक सञ्चालनको कार्य्विधि पनि समेटिएको छ । जसमा बैठकको अध्यक्षता लगायतका विषय पनि समेटिएका छन् ।

यसअघिको अभ्यास अनुसार नै संयुक्त बैठकको अध्यक्षता प्रतिनिधिसभा सभामुखले गर्नुहुनेछ । यस्तै, संयुक्त नियमावलीमा दुबै सदनबाट निक्र्यौल हुनुपर्ने जनमतसंग्रहको प्रक्रिया पनि समेटिएको छ ।