काठमाडौं, २१ फागुन । निर्वाचन आयोगले फागुन २९ गते सम्पन्न हुन लागेको राष्ट्रपति निर्वाचनको लागि मतदाताको नाम सोमबार सार्वजनिक गरेको छ । निर्वाचनमा प्रदेससभा र प्रतिनिधिसभाका सांसदले मत दिनेछन् ।
संघीय संसदका ३३१ र प्रदेशसभा संसदका ५४९ जना गरी राष्ट्रपति निर्वाचनमा ८८० जना मतदाता छन्।
सार्वजनिक गरिएको नामावलीमा मनाङबाट स्वतन्त्र लडेर विजयी भएका दिपक मनाङे उर्फ राजिव गुरुङको नाम समावेश छैन । पूनरावेदन अदालतले ज्यान मुद्धामा फैसला गरेको निर्णय नै सर्वोच्चले सदर गरेर जेल चलान हुनुपर्ने भएपछि मनाङे अहिले फरार छन् ।
टीकापुर काण्डको लागि पुर्पक्षको लागि थुनामा रहेका सांसद रेशम चौधरीको नाम भने मतदाता नामावलीमा समावेश छ । उनले केहि दिन अघि आत्मसर्मपण गरेका थिए ।
त्यस्तै राष्ट्रियसभामा सरकारबाट मनोनित तीनलाई सर्वोच्चले शपथ नगराउन आदेश दिएकाले उनीहरुको नाम पनि मतदाता नामावलीमा समावेश छैन ।
यसो हुँदा राष्ट्रपति निर्वाचनमा कुल संघीय संसदबाट तीन सय ३१ जनाले सहभागि जनाउने भएका छन् ।
संघीय संसदका सदस्यको मतभार ७९ कायम गरिएको छ भने प्रदेशसभा सदस्यको मतभार ४८ छ।
प्रतिक्रिया दिनुहोस्