काठमाडौं, ४ साउन। राष्ट्रिय प्राथमिकतामा रहेको सूर्यविनायक–धुलिखेल सडक विस्तार आयोजना निर्माणको गति तीव्र बन्दै गएको छ। भक्तपुरको सूर्यविनायकदेखि काभ्रेको धुलिखेलसम्म फैलिएको १६ किलोमिटर सडक खण्डमा अत्याधुनिक प्रविधिबाट कालोपत्रे, अन्डरपास र ढल निर्माणको काम अघि बढिरहेको छ। तर निर्माणसँगै यात्रुले हिलो, धुलो र जोखिमपूर्ण डाइभर्सनका कारण दैनिक सास्ती पनि खेप्नुपरेको छ।

सडकको एक भागमा आधुनिक एस्फाल्ट पेभर र हेभी रोलरको प्रयोग गरी गुणस्तरीय कालोपत्रे भइरहेको छ भने अर्को भागमा ढल निर्माण अधुरो रहँदा सामान्य वर्षामै सडक हिलाम्मे बन्दै गएको छ। उचित निकासको अभावका कारण सडकमा पानी जम्ने र लेदो हुने समस्या बढेपछि यात्रु तथा चालकहरू जोखिम मोलेर यात्रा गर्न बाध्य छन्।

विशेषगरी मोटरसाइकल, स्कुटर, बस तथा पानी ट्यांकर चालकहरूले हिलोयुक्त सडकमा सन्तुलन कायम गर्न कठिनाइ भोगिरहेका छन्। कतिपय स्थानमा पानीको गहिराइ अनुमान गर्न नसक्दा दुर्घटनाको जोखिमसमेत बढेको स्थानीयको गुनासो छ।

यता आयोजनाअन्तर्गत सडक पूर्वाधार निर्माण भने उल्लेखनीय रूपमा अघि बढिरहेको छ। सडकको एकतर्फी भागमा अन्तर्राष्ट्रिय मापदण्डअनुसार कालोपत्रे भइरहेको छ भने स्थानीय बासिन्दा र साना सवारी साधनको सुरक्षित आवतजावतका लागि सडकमुनि कंक्रिट अन्डरपास निर्माण भइरहेको छ। पहिरोको जोखिम कम गर्न रिटेनिङ पर्खाल निर्माण तथा दीर्घकालीन ढल निकास व्यवस्थापनका लागि कंक्रिट ड्रेनेज च्यानल निर्माणको काम पनि जारी छ।

राजधानी काठमाडौंलाई पूर्वी नेपाल तथा उत्तरी नाकासँग जोड्ने मुख्य सडकका रूपमा रहेको सूर्यविनायक–धुलिखेल सडक विस्तार सम्पन्न भएपछि यात्रा सहज, सुरक्षित र छिटो हुने अपेक्षा गरिएको छ। तर निर्माण अवधिमा प्रभावकारी ट्राफिक व्यवस्थापन, व्यवस्थित डाइभर्सन तथा हिलो–धुलो नियन्त्रणका उपाय प्रभावकारी रूपमा लागू गर्नुपर्ने माग स्थानीयवासी र यात्रुहरूले गरेका छन्।

पूर्वाधार विकासले दीर्घकालीन लाभ दिने विश्वास गरिए पनि निर्माण अवधिमा सर्वसाधारणले भोग्नुपरेको असुविधा न्यूनिकरण गर्न सम्बन्धित निकायले थप जिम्मेवारीका साथ काम गर्नुपर्ने आवश्यकता देखिएको छ।