झापा, ४ साउन। पूर्व–पश्चिम राजमार्गलाई आधुनिक र आकर्षक बनाउने लक्ष्यसहित सडक विभागले अघि सारेको ‘ल्याण्डमार्क ब्रिज’ अवधारणाअन्तर्गत झापाको रतुवा खोलामा निर्माणाधीन ५८५ मिटर लामो अत्याधुनिक पुलको ५० प्रतिशतभन्दा बढी निर्माण सम्पन्न भएको छ।

काँकडभिट्टादेखि लौकहीसम्मको ९५ किलोमिटर सडक विस्तार आयोजनाअन्तर्गत निर्माण भइरहेका ६ वटा ठूला पुलमध्ये रतुवा पुल सबैभन्दा आकर्षक संरचनामध्ये एक मानिएको छ। कोरियाली परामर्शदाता कम्पनी सोसुङ ले डिजाइन गरेको यो पुल आधुनिक ‘आर्च स्टिल ट्रस’ प्रविधिमा आधारित रहेको छ।

काँकडभिट्टा–लौकही सडक योजना (पश्चिम खण्ड) का योजना प्रमुख जगत प्रजापतीका अनुसार पुलको चौडाइ १६.५ मिटर हुनेछ। पुलमा दुई लेन सडकसँगै सर्भिस लेन र पैदलयात्रुका लागि फुटपाथको व्यवस्था गरिएको छ। संरचनालाई थप मजबुत र आकर्षक बनाउन ८७ देखि ९० मिटर लम्बाइका स्पानहरू प्रयोग गरिएको उहाँले जानकारी दिनुभयो।

उहाँका अनुसार पुल निर्माणमा प्रयोग भइरहेको ४१० र ४२० ग्रेडको उच्च गुणस्तरको स्टिल चीनबाट आयात गरिएको हो। ती स्टिल संरचनाहरू तयार गर्न निर्माण कम्पनीले मोरङको उर्लाबारीमा अत्याधुनिक ‘फ्याब्रिकेसन यार्ड’ स्थापना गरेको छ। यार्डमा कम्प्युटराइज्ड सीएनसी कटिङ र नियन्त्रित वेल्डिङ प्रविधिबाट संरचना निर्माण भइरहेको छ।

नेपालमै पहिलो पटक यति ठूलो आकारको ग्याल्भेनाइजेसन ट्याङ्क प्रयोग गरी स्टिल संरचनालाई खिया लाग्न नदिने प्रविधि अपनाइएको पनि आयोजनाले जनाएको छ। यसले पुलको दीर्घायु र गुणस्तर थप मजबुत बनाउने विश्वास गरिएको छ।

लोहेन्द्र, बक्रा र रतुवा खोलाका तीनवटा पुल एउटै प्याकेजमार्फत निर्माण भइरहेका छन्। करिब साढे ५ अर्ब रुपैयाँ लागत रहेको यस परियोजनामा कोबेक, सीआरइजिसी र तुँदी जेभीले निर्माणको जिम्मेवारी लिएका छन्। स्टिल संरचनाको काम चिनियाँ प्राविधिकले तथा प्रि–स्ट्रेस्ड कंक्रिट (पीएससी) गर्डर निर्माण नेपाली कम्पनी तुँदीले गरिरहेको छ।

सम्झौताअनुसार पुलको निर्माण सन् २०२७ फेब्रुअरी २ भित्र सम्पन्न गर्नुपर्नेछ। वर्षायाममा चीनबाट स्टिल ढुवानीमा केही कठिनाइ देखिए पनि निर्माण कार्य र आवश्यक समन्वय नियमित रूपमा अघि बढिरहेको योजना प्रमुख प्रजापतीले बताउनुभयो। विद्युतीय प्रसारण लाइन स्थानान्तरणलगायतका आवश्यक समन्वयका काम पनि सम्पन्न भइसकेका छन्।

करिब ८० वर्ष आयु हुने अनुमान गरिएको यो पुलले आगामी ५० वर्षसम्मको सवारी चाप सहज रूपमा धान्न सक्ने प्राविधिकहरूको दाबी छ। हाल सञ्चालनमा रहेको करिब ५० वर्ष पुरानो पुलको विकल्पका रूपमा निर्माण भइरहेको नयाँ पुल सञ्चालनमा आएपछि पूर्व–पश्चिम राजमार्गमा आवागमन थप सुरक्षित, सहज र प्रभावकारी हुने अपेक्षा गरिएको छ।