काठमाडौं । पारिवारिक सम्बन्ध, अंश विवाद र देउरानी–जेठानीबीचको तनावलाई केन्द्रमा राखेर निर्माण गरिएको नेपाली चलचित्र ‘झिँगेदाउ–२’ को टिजर सार्वजनिक गरिएको छ।

सार्वजनिक टिजरमा एउटै परिवारभित्र बढ्दै गएको मनमुटाव, मध्यरातमा घर छाडेर हिँड्ने पात्र, आमाको खोजी, सम्पत्ति बाँडफाँडको विवाद तथा चिसिएको सम्बन्धले निम्त्याउने द्वन्द्वलाई भावनात्मक ढंगले प्रस्तुत गरिएको छ। विशेषगरी देउरानी र जेठानीबीचको टकरावले कथाको मुख्य संघर्षलाई संकेत गरेको छ।

टिजरको अन्त्यतिर अभिनेता आर्यन सिग्देलको प्रवेशले कथाप्रति थप उत्सुकता सिर्जना गरेको छ। उनको भूमिकाबारे विस्तृत खुलाइएको छैन, तर उनको उपस्थितिले कथामा नयाँ मोड आउने संकेत देखिएको छ।

ज्ञानेन्द्र देउजाको निर्देशनमा तयार भएको चलचित्र आगामी असोज २ गतेदेखि देशभर प्रदर्शनमा आउने तयारीमा छ।

चलचित्रमा केकी अधिकारी, आँचल शर्मा, महेश त्रिपाठी, कुशल विष्ट, सरोज खनाललगायत कलाकारहरूको अभिनय रहेको छ।

फिल्मको पटकथा तथा संवाद परिच्छेद सेनले तयार गरेका हुन् भने कथा गोविन्द फुयाल र शिशिर चालिसेले लेखेका छन्। चलचित्रमा सुलभ प्रतीक देउजा र समिक्षा देउजाको लगानी रहेको छ।

पारिवारिक सम्बन्धमा आउने उतारचढाव, भावनात्मक द्वन्द्व र सामाजिक यथार्थलाई केन्द्रमा राखेर निर्माण गरिएको ‘झिँगेदाउ–२’ ले पहिलो श्रृंखलाको सफलतालाई निरन्तरता दिने अपेक्षा गरिएको छ।

Originally published on abcnews.com.np.