पोखरा । कास्कीको प्रसिद्ध मर्दी हिमाल पदयात्रामा गएका पोखराका तीन जना युवा जंगलमा अलपत्र परेका छन्। उनीहरू माछापुच्छ्रे गाउँपालिका–९ को बादलडाँडा क्षेत्रबाट सम्पर्कविहीन भएपछि नेपाल प्रहरीले खोजी तथा उद्धार अभियान तीव्र बनाएको छ।

अलपत्र पर्नेमा पोखरा महानगरपालिका–१४ खसिबजारका २४ वर्षीय अजित जिसी, २३ वर्षीय युकेश गुरुङ र २३ वर्षीय दिपेश गुरुङ रहेका छन्। प्रहरीका अनुसार उनीहरू आज बिहान करिब ८ बजेसम्म परिवारसँग सम्पर्कमा थिए। त्यसपछि उनीहरूको मोबाइल फोन बन्द भएपछि सम्पर्क टुटेको हो।

युवाहरू हराएको सूचना बिहान ११ बजे प्राप्त भएपछि स्थानीय होटल व्यवसायी प्रेम अधिकारीसहित चार जनाको टोलीले प्रारम्भिक खोजी सुरु गरेको थियो।

घटनाबारे थप जानकारी संकलन तथा खोजीका लागि भेँडावारी प्रहरी पोस्टबाट प्रहरी हवल्दार जीवन बरालको नेतृत्वमा दुई सदस्यीय टोली परिचालन गरिएको थियो। स्थानीय बासिन्दा र बेपत्ता युवाका आफन्तसँग समन्वय भइरहेका बेला आज दिउँसो करिब २ बजे उनीहरू अन्नपूर्ण गाउँपालिका–११ अन्तर्गत छुमरुङको फेदीस्थित मोदी खोलापारिको क्षेत्रमा रहेको सूचना प्राप्त भएको प्रहरीले जनाएको छ।

उक्त सूचनापछि प्रहरी चौकी घान्द्रुकबाट प्रहरी नायब निरीक्षक राजेन्द्र पौडेलको नेतृत्वमा थप दुई सदस्यीय टोली घटनास्थलतर्फ खटिएको छ।

प्रहरीका अनुसार युवाहरू रहेको भनिएको स्थानमा पुगेर उद्धार गर्ने प्रयास भइरहेको छ। उद्धार अभियानमा नेपाल प्रहरीसँगै सशस्त्र प्रहरी बलको टोली पनि परिचालित भएको छ।

प्रहरीले मौसम र भौगोलिक कठिनाइका बीच उद्धार कार्य जारी रहेको जनाएको छ। युवाहरूको अवस्था र उद्धारबारे थप विवरण आउन बाँकी रहेको छ।

Originally published on abcnews.com.np.