काठमाडौं । नेपाली कांग्रेसका सभापति गगनकुमार थापाले वर्तमान सरकार ‘शासकीय अराजकता’ तर्फ उन्मुख भएको आरोप लगाएका छन् । उनले सरकारको कार्यशैली, कानुन कार्यान्वयन र आन्दोलनरत पक्षसँग भएका सम्झौता कार्यान्वयनमा गम्भीर प्रश्न उठाएका हुन् ।

नेपाल लोकतन्त्रवादी आदिवासी जनजाति महासंघको दोस्रो राष्ट्रिय सम्मेलनलाई सम्बोधन गर्दै थापाले लोकतन्त्रको मूल आधार विधिको शासन भएको उल्लेख गर्दै कानुनभन्दा माथि कोही पनि हुन नसक्ने बताए । मन्त्री र सांसदहरूबाटै उत्तेजक तथा धम्कीपूर्ण अभिव्यक्ति आउनु विधिको शासनमाथिको चुनौती भएको उनको भनाइ थियो ।

उनले विभिन्न माग राखेर आन्दोलनरत लघुवित्त तथा सहकारी पीडित, शिक्षक, नर्स र चिकित्सकसँग सरकारले गरेका सम्झौताहरू कार्यान्वयन नभएको भन्दै असन्तुष्टि जनाए । सरकारले आफ्नै प्रतिबद्धता पूरा नगर्दा नागरिकको राज्यप्रतिको भरोसा कमजोर बन्दै गएको उनले बताए ।

थापाले वर्तमान सरकारमा बहुमतको अहंकार देखिएको आरोप लगाउँदै प्रधानमन्त्रीको कार्यशैलीप्रति पनि प्रश्न उठाए । मन्त्रीहरूविना बैठक बस्ने र राज्यका महत्वपूर्ण निकायका प्रमुखहरूलाई हतोत्साहित गर्ने प्रवृत्तिले शासकीय अराजकता बढाएको उनको दाबी थियो ।

उनले अहिले नागरिकमा सरकारप्रति व्यापक असन्तुष्टि रहेको उल्लेख गर्दै नेपाली कांग्रेसले जिम्मेवार प्रतिपक्षको भूमिका निर्वाह गर्दै आन्दोलनलाई उक्साउने नभई सरकारलाई आफ्ना प्रतिबद्धता कार्यान्वयन गर्न दबाब दिने बताए ।

सभापति थापाले कांग्रेसको मूल आदर्श नै विधिको शासन र लोकतान्त्रिक मूल्यको रक्षा भएको उल्लेख गर्दै वर्तमान परिस्थितिमा जनताको भरोसा कायम राख्ने र लोकतन्त्रको संरक्षण गर्ने जिम्मेवारी कांग्रेसको काँधमा रहेको बताए ।

Originally published on abcnews.com.np.