काठमाडौं । राष्ट्रिय स्वतन्त्र पार्टी (रास्वपा)बाट सरकारमा सहभागी मन्त्रीहरूले अब महिनामा कम्तीमा एकपटक पार्टी केन्द्रीय कार्यालयमा पुगेर नागरिक र पार्टीपंक्तिसँग प्रत्यक्ष संवाद गर्नुपर्ने भएको छ ।

रास्वपाका सहमहामन्त्री असिम शाहका अनुसार नेतृत्वलाई निरन्तर नागरिकको निगरानी, सुझाव र सम्पर्कमा राख्ने उद्देश्यले आगामी भदौदेखि ‘नागरिक, नीति र नेतृत्व’ कार्यक्रम सञ्चालन गर्न लागिएको हो ।

कार्यक्रमअन्तर्गत रास्वपाका मन्त्रीहरू महिनामा कम्तीमा एकपटक केन्द्रीय कार्यालय ‘घण्टीघर’मा अनिवार्य उपस्थित भई सर्वसाधारणका गुनासा, समस्या, अपेक्षा र सुझाव प्रत्यक्ष सुन्नेछन् ।

कार्यक्रम दुई चरणमा सञ्चालन हुनेछ । पहिलो चरणमा साँझ ५ देखि ६ बजेसम्म ‘नागरिक संवाद’ हुनेछ, जसमा आमनागरिकका लागि प्रत्यक्ष रूपमा सहभागी हुने व्यवस्था गरिनेछ ।

त्यसपछि साँझ ६ बजेपछि ‘नेतृत्व संवाद’ सञ्चालन हुनेछ । यस चरणमा सम्बन्धित मन्त्री, पार्टीका केन्द्रीय समिति सदस्य तथा प्रतिनिधिसभा सदस्यबीच संयुक्त बैठक बस्ने र नागरिकबाट प्राप्त सुझावसहित समसामयिक तथा नीतिगत विषयमा छलफल गरिने रास्वपाले जनाएको छ ।

रास्वपाका अनुसार नागरिकका आवाजलाई सिधै राज्यको नीति निर्माण र कार्यान्वयनको तहसम्म पुर्‍याउने उद्देश्यले कार्यक्रम सञ्चालन गर्न लागिएको हो।

Originally published on abcnews.com.np.