काठमाडौं । पूर्वप्रधानमन्त्री तथा नेपाली कांग्रेसका पूर्वसभापति शेरबहादुर देउवा साढे पाँच महिनापछि आज स्वदेश फर्किँदै छन्।

देउवा बिहीबार दिउँसो पत्नी आरजु राणा देउवासहित थाइल्यान्डबाट काठमाडौं आउन लागेका हुन्। कांग्रेस नेता डा. प्रकाशशरण महतका अनुसार देउवा दिउँसो साढे १२ बजे थाई एयरको उडानबाट काठमाडौं अवतरण गर्नेछन्। उनको स्वागतका लागि देउवा पक्षले तयारी गरेको छ।

यसअघि देउवा साउन २६ गते राति नेपाल फर्किने तयारीमा थिए। रातिको समयमा स्वागत व्यवस्थापनमा समस्या हुने भन्दै उनको आगमन दुई दिन पछि सारिएको बताइएको छ।

देउवा गत फागुन १३ गते उपचारका लागि सिंगापुर गएका थिए। त्यतिबेला भारत भ्रमणमा रहेकी आरजु पनि उपचारका लागि सिंगापुर पुगेकी थिइन्। त्यसपछि दुवै जना थप उपचारका लागि हङकङ पुगेको जानकारी दिइएको थियो।

गत भदौ २४ गतेको जेनजी आन्दोलनका क्रममा बुढानीलकण्ठस्थित देउवा निवासमा आगजनी हुँदा देउवा दम्पतीमाथि समेत आक्रमण भएको थियो। त्यसपछि नेपालमा उपचार गराएका उनीहरू थप उपचारका लागि सिंगापुर गएका थिए। उपचारपछि नेपाल फर्किए पनि ‘फलोअप’का लागि देउवा पुनः सिंगापुर गएको बताइएको छ।

पक्राउ पुर्जीपछि सर्वोच्चको अन्तरिम आदेश

देउवा दम्पती सिंगापुरमा रहँदा उनीहरूविरुद्ध सम्पत्ति शुद्धीकरण अनुसन्धान विभाग र नेपाल प्रहरीको केन्द्रीय अनुसन्धान ब्युरो (सीआईबी)ले सम्पत्ति शुद्धीकरणसम्बन्धी अनुसन्धानका क्रममा पक्राउ पुर्जी जारी गरेको थियो।

पक्राउ पुर्जी रोक्न माग गर्दै वारेसमार्फत दायर रिटमा सर्वोच्च अदालतले देउवा र आरजुलाई तत्काल पक्राउ नगर्न अन्तरिम आदेश जारी गरेको थियो।

राष्ट्रिय भेलाको सम्मुखमा स्वदेश फिर्ता

कांग्रेसभित्र असन्तुष्टि चुलिएका बेला देउवा स्वदेश फर्किन लागेका हुन्। देउवा पक्षले साउन २९ देखि ३१ गतेसम्म काठमाडौंमा राष्ट्रिय भेला आयोजना गर्दैछ।

पूर्वमहामन्त्री डा. शशांक कोइरालाको नेतृत्वमा आयोजक समिति गठन गरिएको भेलाको उद्घाटन सुकेधारास्थित मिराकल पार्टी प्यालेसमा हुने तय भएको छ। भेलामा करिब साढे चार हजार प्रतिनिधि सहभागी हुने बताइएको छ।

राष्ट्रिय भेलाको ठीक अघि देउवाको स्वदेश फिर्तीलाई कांग्रेसभित्रको शक्ति समीकरण र आगामी राजनीतिक रणनीतिका दृष्टिले समेत महत्वपूर्ण रूपमा हेरिएको छ।

Originally published on abcnews.com.np.