काठमाडौं । इरानविरुद्ध अमेरिकी राष्ट्रपति डोनाल्ड ट्रम्पले सुरु गरेको लामो सैन्य अभियानका कारण अमेरिकी सैनिकहरू गम्भीर मानसिक दबाबमा परेको रिपोर्ट सार्वजनिक भएको छ ।

‘मिलिटरी टाइम्स’का अनुसार फाइटर जेट बोक्ने अमेरिकी विमानवाहक युद्धपोत यूएसएस अब्राहम लिंकनमा तैनाथ करिब पाँच हजार नौसैनिक र मरिन्सका परिवारले लामो समयदेखि समुद्रमै रहनुपरेको, कमजोर सुविधा र पटक–पटक तैनाथी लम्ब्याइएको भन्दै चिन्ता व्यक्त गरेका छन् ।

रिपोर्टअनुसार जहाजमा केही सैनिकले आत्महत्या गर्ने प्रयाससमेत गरेका छन् ।

‘यूएसएस अब्राहम लिंकन’ नौ महिनादेखि निरन्तर समुद्रमा रहेको छ । यस अवधिमा जहाज लगातार २५० दिनसम्म जमिनमा नआई समुद्रमै रहेको बताइएको छ ।

लामो तैनाथीका कारण सैनिकहरू मानसिक रूपमा थकित हुँदै गएको परिवारका सदस्यहरूले बताएका छन् । गत बिहीबार स्यान डिएगोमा आयोजित बैठकमा करिब २०० सैनिकका परिवारका सदस्यले नौसेनाका वरिष्ठ अधिकारीहरूसामु जहाजमा बढ्दै गएको संकटबारे प्रश्न गरेका थिए ।

सैनिक परिवारको चिन्ता

एक सैनिककी पत्नीले कार्यवाहक नौसेना सचिव हङ काओलाई उनका श्रीमान्ले सोही दिन पठाएको सन्देशबारे जानकारी गराएकी थिइन् । उनका श्रीमान्ले सन्देशमा आफू भोलि बिहान उठ्न नपरोस् भन्ने आशय व्यक्त गरेको उनले बताइन् ।

अर्का परिवारका सदस्यले नौसेना नेतृत्वले परिवार र नेतृत्वबीचको विश्वास तोडेको आरोप लगाए ।

‘मिलिटरी टाइम्स’सँग कुरा गर्दै नौसेना परिवारकी सदस्य अनाबेल लोमाले आफ्ना श्रीमान्ले पटक–पटक तैनाथी लम्ब्याइएपछि समुद्रमा फाल हान्ने प्रयास गरेको बताइन् ।

उनका अनुसार श्रीमान् मानसिक र शारीरिक रूपमा पूर्ण रूपमा थाकिसकेका छन् र आफ्नो १३ वर्ष लामो सैन्य करिअरसमेत जोखिममा परेको महसुस गरिरहेका छन् ।

अर्को घटनामा एक नौसैनिककी श्रीमतीले उनका श्रीमान्ले आफ्ना साथीलाई समुद्रमा फाल हान्नबाट रोकेको बताइन् । ती नौसैनिकले साथीलाई समातेर पुनः जहाजको डेकमा तानेका थिए ।

यी घटनाले लामो समयसम्मको तैनाथीले केही सैनिकलाई उनीहरूको सहनशीलताको सीमासम्म पुर्‍याइरहेको चिन्ता बढाएको छ ।

नौ महिनादेखि समुद्रमै युद्धपोत

‘यूएसएस अब्राहम लिंकन’ नोभेम्बर २१ मा स्यान डिएगोबाट रवाना भएको थियो । सुरुमा यसलाई प्रशान्त महासागरतर्फ पठाउने योजना थियो ।

तर अमेरिका–इजरायल र इरानबीच युद्ध सुरु भएपछि युद्धपोतलाई मध्यपूर्वतर्फ पठाइएको थियो । त्यसयता सैनिकहरूले जमिनमा निकै कम समय बिताउन पाएका छन् ।

‘एमएस नाउ’का अनुसार पाँच हजारभन्दा बढी नौसैनिक र मरिन्सले अहिलेसम्म जम्मा दुई दिन मात्र जमिनमा बिताउने अवसर पाएका छन् । उनीहरू एकपटक डिसेम्बरमा गुआम र अर्को पटक जुलाईमा ओमानमा रोकिएका थिए ।

युद्धपोतको तैनाथी यसअघि मे महिनामा सकिने तय थियो । तर युद्ध जारी रहेपछि तैनाथी पटक–पटक लम्ब्याइएको हो ।

आधारभूत सुविधामै गुनासो

लामो तैनाथीका कारण उत्पन्न मानसिक तनावसँगै युद्धपोतका आधारभूत सुविधालाई लिएर पनि सैनिक र परिवारबाट गुनासा आएका छन् ।

क्यालिफोर्नियाका डेमोक्र्याट सांसद माइक लेभिनले सामाजिक सञ्जाल ‘एक्स’मार्फत जहाजमा सैनिकहरूले सामना गरिरहेका समस्याबारे जानकारी दिएका छन् ।

उनले ढुसी लागेका सावर, बिग्रिएका शौचालय, हप्तौँदेखि बन्द वासिङ मेसिन, लामो समयसम्म तातो पानी नआउनु तथा पर्याप्त खाना नपाइनजस्ता समस्या रहेको दाबी गरेका छन् ।

लेभिनका अनुसार सैनिकले कतिपय अवस्थामा आधा कप चामल र दुईवटा टोर्टिला मात्र खाना पाएको तथा साबुन, डियोडोरेन्ट र मञ्जनसमेत पर्याप्त नभएको गुनासो गरेका छन् ।

यसअघि अप्रिलमा पनि जहाजमा उपलब्ध खाना कम परिमाणको र गुणस्तरहीन रहेको भन्दै तस्बिर सार्वजनिक भएका थिए । पानीको अभाव, ढुसी लागेको सावर र बिग्रिएका वासिङ मेसिनबारे समेत गुनासा आएका थिए ।

त्यतिबेला रक्षामन्त्री पिट हेगसेथले यस्ता समाचारलाई ‘फेक न्युज’ भन्दै खारेज गरेका थिए । तर सांसद लेभिनले त्यसको खण्डन गर्दै नौसेनाले आफ्ना सैनिकका आधारभूत आवश्यकतादेखि महत्त्वपूर्ण जिम्मेवारीसम्म उचित रूपमा पूरा गर्न नसकेको आरोप लगाएका छन् ।

लामो समयसम्म युद्ध क्षेत्रमा तैनाथी, बारम्बार थपिएको जिम्मेवारी र आधारभूत सुविधाको अभावले अमेरिकी नौसैनिकको मानसिक स्वास्थ्यमा गम्भीर असर पारिरहेको परिवारहरूको भनाइ छ ।

Originally published on abcnews.com.np.