काठमाडौं । प्रधानमन्त्री बालेन्द्र शाह र प्रधानसेनापति अशोकराज सिग्देलबीच शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा भेटवार्ता भएको छ।

प्रधानसेनापति सिग्देल प्रधानमन्त्री शाहलाई भेट्न सिंहदरबार पुगेका थिए। प्रधानमन्त्री कार्यालय स्रोतका अनुसार उनीहरूबीच केही समय छलफल भएको छ। भेटमा के विषयमा छलफल भयो भन्नेबारे भने आधिकारिक रूपमा जानकारी दिइएको छैन।

नेपाली सेनाका प्रवक्ता सहायक रथी राजाराम बस्नेतले पनि भेटको विषयबारे आफूलाई जानकारी नभएको बताए।

नियमित भेट भएको सेनाको दाबी

नेपाली सेनाले प्रधानमन्त्री र प्रधानसेनापतिबीचको भेटलाई नियमित भेटका रूपमा व्याख्या गरेको छ। तर, यसअघि साउन १९ गते पनि प्रधानमन्त्री शाह र प्रधानसेनापति सिग्देलबीच भेटवार्ता भएको थियो।

त्यस भेटमा गोकर्णमा नेपाली सेनाको संरक्षणमा रहेको नेपाल ट्रस्टको जग्गामा रास्वपाका सांसद राजु पाण्डेको नेतृत्वमा डोजर चलाइएको घटनाबारे छलफल भएको प्रधानमन्त्री कार्यालय स्रोतले जनाएको थियो।

सेनाको संरक्षणमा रहेको जग्गामा सैनिक अधिकारीको अवरोधका बाबजुद डोजर चलाइएको विषयमा प्रधानसेनापति सिग्देलले असन्तुष्टि व्यक्त गरेको स्रोतको दाबी थियो। उक्त घटनापछि सांसद पाण्डेले विज्ञप्तिमार्फत आफ्नो धारणा सार्वजनिक गरेका थिए।

फेरि भेट भएपछि चासो

नेपाल ट्रस्टको जग्गा प्रकरणपछि प्रधानमन्त्री र प्रधानसेनापतिबीच पुनः भेटवार्ता भएकाले शुक्रबारको छलफललाई चासोका साथ हेरिएको छ।

रक्षा मन्त्रालयको जिम्मेवारीसमेत सम्हालिरहेका प्रधानमन्त्री शाह र प्रधानसेनापति सिग्देलबीचको भेटको विषयवस्तु सार्वजनिक नभए पनि सुरक्षा तथा समसामयिक विषयमा छलफल भएको हुन सक्ने अनुमान गरिएको छ।

तर, भेटमा कुन विषयमा छलफल भयो भन्नेबारे प्रधानमन्त्री कार्यालय वा नेपाली सेनाले औपचारिक जानकारी दिएको छैन।

Originally published on abcnews.com.np.