काठमाडौं । नेपाली कांग्रेसका नेता मोहन बस्नेतले सभापति गगन थापाको नेतृत्वमा पार्टी अघि बढ्न नसक्ने दाबी गरेका छन् । उनले पूर्वसभापति शेरबहादुर देउवाको नेतृत्वमै कांग्रेसलाई अघि बढाउनुपर्ने बताएका छन् ।

कांग्रेस इतर पक्षको राष्ट्रिय भेलालाई सम्बोधन गर्दै बस्नेतले सरकारलाई समेत डोर्याएर मुलुकलाई निकास दिने हैसियत देउवामै रहेको दाबी गरे । उनले विशेष महाधिवेशनका पक्षधरलाई ‘खरानी दस्ता’को संज्ञा दिँदै गगन थापामाथि तीव्र आलोचना गरे ।

गगन थापाले आफूलाई युवा नेताका रूपमा प्रस्तुत गरे पनि ५२ वर्ष पार गरिसकेको भन्दै बस्नेतले उनको उमेरलाई लिएर समेत टिप्पणी गरे ।

‘उहाँले युवा भन्नुहुन्छ, ५२ वर्ष नाघिसक्नुभएको छ । उहाँले ५५ वर्ष पुगेपछि मैले राजनीति छोड्छु भन्नुभएको छ । अब तीन वर्षमा चुनाव नियमित प्रक्रियामा भयो भने आउने चुनाव उहाँ लड्न भ्याउनुहुन्न,’ उनले भने ।

बस्नेतले गगन थापाले कांग्रेसलाई ‘भष्मखरानी’ बनाएको आरोप लगाउँदै पार्टी चलाउन उनको नेतृत्व पर्याप्त नभएको टिप्पणी गरे ।

‘बोकाले दाइँ हुने भए गोरु चाहिँदैन । त्यसकारण आज पार्टी चलेको छैन, पार्टी बर्बाद भएको छ, भष्मखरानी भएर गएको छ,’ उनले भने ।

उनले देउवाको नेतृत्वमा कांग्रेसलाई वडा, पालिका, प्रदेश, प्रतिनिधिसभा र राष्ट्रियसभासम्म बलियो अवस्थामा पुर्‍याइएको दाबी गरे ।

गगनको नेतृत्वमाथि प्रश्न उठाउँदै बस्नेतले भने, ‘त्यत्रो कांग्रेसको हालत सानो बनाइएको छ । अझै गगन नभएको कांग्रेस माटोमा मिल्थ्यो रे ? तपाईँहरू खरानी भइसक्नुभयो । तपाईँबाट पार लाग्दैन ।’

गगन थापाले युवालाई अगाडि बढाएर आफू राजनीतिबाट अलग हुन तयार रहेको बताएको प्रसंगमा बस्नेतले आफू पनि त्यसका लागि तयार रहेको बताए ।

उनले भने, ‘कांग्रेस शून्य भएको ठाउँमा मैले चुनाव जितेर ठूला दल बनाएर सिन्धुपाल्चोकबाट आएको हो । तपाईँजस्तो भागीभागी अर्काले दुःख गरेको ठाउँमा गएर चुनाव लड्न परेको छैन । उहाँको चुनाव क्षेत्र नभएको कुरा प्रमाणित भएको छ । त्यो भए तपाईँ पनि चुनाव नलड्नुस्, म पनि लड्दिनँ । मुखले बकवास गरेर हुँदैन, फण्डा नगरौँ, व्यवहारमा उतारौँ ।’

Originally published on abcnews.com.np.